دەپۋتات باليەۆا نەلىكتەن قازاق ادەبيەتىن اعىلشىنشا وقۋ قاجەت ەكەنىن ءتۇسىندىردى
قازاقستانداعى بالا قۇقىعى جونىندەگى ۋاكىل زاعيپا باليەۆا نەلىكتەن قازاق ادەبيەتىن وقىتقاندا اعىلشىن تىلىندە دە قولدانۋ قاجەتتىگىن ءتۇسىندىردى، دەپ حابارلايدى Sputnik قازاقستان ءتىلشىسى.
ايتا كەتەيىك، بۇعان دەيىن زاعيپا باليەۆا قازاق ادەبيەتىن اعىلشىن تىلىندە وقىتۋدى ۇسىنعان ەدى. ال بۇگىن سول ويىن تارقاتىپ ايتىپ، قازاق ادەبيەتىن مەكتەپتەردە ەكى تىلدە قازاق جانە اعىلشىن تىلىندە قاتار بەرۋ كەرەك دەگەن پىكىرىن جەتكىزدى.
«قازاق ادەبيەتىن قازاق جانە اعىلشىن تىلىندە بەرسە، بالا ءتىلدى ەركىن مەڭگەرەدى. ماعىناسىن تۇسىنەتىن بولادى. ال قازىر فيزيكا، بيولوگيانى اعىلشىنشا وقىپ جاتقانمەن، ءتۇسىنىپ جاتقانى شامالى. «اباي جولىن» قازاق تىلىندە وقۋعا ەشكىم تىيىم سالمايدى.
ماسەلە - ساباقتى قازاق جانە اعىلشىن تىلدەرىندە ارالاس بەرۋ تۋراسىندا. مەنىڭ ويىم بالالار ءۇش تىلدە ەمىن-ەركىن سويلەسە ەكەن دەيمىن. قازاق ادەبيەتىن ارالاس بەرسە، ولار سوزدەردىڭ ماعىناسىن ۇعىنىپ سويلەيدى. ەرتەڭگى كۇنى شەتەلگە بارعان كەزدە، ابايدىڭ ولەڭدەرى، قارا سوزدەرىن اعىلشىن تىلىندە ەركىن جەتكىزەتىن بولادى»، - دەيدى ول.
زاعيپا باليەۆا بالالارعا ادەبيەتتى ەكى تىلدە بەرۋ زيان تيگىزبەيتىنىن ايتتى.
«سوندىقتان، مينيسترلىك، ەڭ الدىمەن ەكى ءتىلدى جەتىك مەڭگەرگەن مۇعالىمدەردى دايىنداۋى كەرەك»، - دەدى باليەۆا.
ەستەرىڭىزگە سالىپ وتسەك، زاعيپا باليەۆا ق ر ءدىن ىستەرى جانە ازاماتتىق قوعام مينيسترلىگىنىڭ جانىنداعى ۇ ە ۇ- مەن ءوزارا ءىس-قيمىل جونىندەگى ۇيلەستىرۋ كەڭەسىنىڭ وتىرىسىندا وقۋشىلارعا قيىنعا سوعاتىن جاراتىلىستانۋ پاندەرىن ەمەس، قازاق ادەبيەتى سەكىلدى گۋمانيتارلىق پاندەردى اعىلشىن تىلىندە وقىتۋدى ۇسىنعان ەدى.
«بالا ءپاندى انا تىلىندە ارەڭ ءتۇسىنىپ، %12 عا عانا مەڭگەرسە، وندا ول اعىلشىن تىلىندە قالاي وقيدى؟ وندا ونىڭ ءپاندى يگەرۋ كورسەتكىشى بۇدان دا تومەن دەگەن ءسوز. مۇمكىن، بالالارمەن اڭگىمەلەسىپ، قانداي ءپاندى اعىلشىن تىلىندە وقىتۋ كەرەكتىگىن وزدەرىنەن سۇراۋ كەرەك شىعار.
بالا اعىلشىنشا سويلەپ، ماعىناسىن ءتۇسىنىپ ۇيرەنۋى كەرەك. مۇمكىن، ادەبيەت نەمەسە قازاق ادەبيەتىن اعىلشىن تىلىندە بەرسەك؟ بالكىم، سول كەزدە وقۋشى ونى ءتۇسىنىپ، سول تىلدە سويلەيتىن بولادى. ال مىنا فورمۋلالار، وم زاڭى وعان ومىردە تۇك تە قاجەت ەمەس.
ءبىز تەحنيكالىق مامانداردى از دايىندايمىز. ءارى كەتسە 5 پايىز عانا شىعاتىن شىعار»، - دەگەن ەدى باليەۆا.