ءوز الاڭىندا «استانا» «ۆيلياررەالدان» ۇتىلىپ قالدى
«ا» توبىننىڭ كوشباسشىلارى اراسىنداعى ويىننىڭ ناتيجەسىنە كوپ ماسەلە بايلانىستى ەدى. كوماندالار دا وسىنى جاقسى ءتۇسىنىپ، العاشقى تايمدا ساقتىقپەن وينادى.
ويىن الدىندا ەلوردالىق ۇجىمنىڭ باس باپكەرى ستانيمير ستويلوۆ تا اسا قيىن ويىن كۇتىپ تۇرعانىن ايتقان بولاتىن. ايتقانىنداي-اق ءبىرىنشى تايم قوناقتاردىڭ باسىمدىعىمەن ءوتتى.
العاشقى قاۋىپتى ساتتەردىڭ استانالىق كوماندا قاقپاسىنىڭ ماڭىندا بولعانى دا وسىنى راستايدى. قارسى شابۋىلعا يەك ارتقان ءبىزدىڭ جىگىتتەر تۋىنداعان ءاربىر مۇمكىندىكتى ۇتىمدى پايدالانۋعا تىرىستى.
22-مينۋتتا وسى تاكتيكا جەمىسىن بەردى: تۆۋماسيدەن دوپتى قابىلداپ العان دجۋنيور كابانانگا الىستان كۇشتى سوققى باعىتتاپ، ەسەپتى اشتى. بىرتە-بىرتە ەس جيىپ العان «سارى سۋبمارينا» جوسپارلى شابۋىلدارىن ۇدەتە ءتۇستى.
تايم سوڭىنا قاراي وڭ قاناتتان جارىپ كىرگەن دانيەل رابا ەسەپتى تەڭەستىرىپ كەتتى.
«ۆيلياررەال» ەكىنشى تايمدى شابۋىلعا جۇلقىنا كىرىسۋمەن باستادى. كاپيتان مانۋەل تريگەروستىڭ باسشىلىعىندا ەرناندەس - رابا - فورنالس فۋتبولشىلارىنان قۇرالعان رومب ءبىرىنشى تايمداعى سەكىلدى ويىندى ءوز باقىلاۋىندا ۇستادى.
باستىرمالاتا شابۋىلداعان يسپانيالىق ۇجىم 65- جانە 84-مينۋتتاردا تاعى ەكى گول سوقتى. الاڭعا قوسالقى قۇرامنان قوسىلعان سەدريك باكامبيۋ دۋبل اۆتورى اتاندى.
ءبىزدىڭ كوماندا ەكىنشى تايمداعى العاشقى ناقتى گول سوعۋ مۇمكىندىگىنە 88-مينۋتتا قول جەتكىزدى. قارسىلاستاردىڭ ايىپ الاڭىنىڭ سول جاق توبەسىنەن جارىپ كىرگەن پاتريك تۆۋماسي دوپتى تومەنگى الىس بۇرىشقا كۇشتى سوققىمەن شەگەلەدى، ەسەپ - 2:3.
جىگەرلەنە تۇسكەن «استانا» ءبىر ۇپاي الۋ ءۇشىن بارىن سالدى. الايدا، اتتەگەن-اي، ۋاقىت جەتپەي قالدى.
وسى ويىننان كەيىن «ۆيلياررەال» 11 ۇپايمەن 1/16 فينالعا جولدامانى مەرزىمىنەن بۇرىن يەلەندى، ال 7 ۇپايمەن ازىرگە ەكىنشى ورىندا تۇرعان «استانا» پلەي-وففقا شىعۋ ماسەلەسىن 6-تۋرعا قالدىردى. 30 مىڭ ورىندىق «استانا ارەنا» ستاديونى كورەرمەنگە لىق تولى بولعانىن ايتا كەتەيىك.
اۆتور: نۇرلان تۇياقوۆ