قاريالار باتا بەرۋدەن جارىستى - فوتو

شىمكەنت. قازاقپارات - وڭتۇستىك قازاقستان وبلىسىندا باتاگوي قاريالار مەن ەل اعالارى اراسىندا «قازىنالى قاريا» اتتى سايىس ءوتتى.

ارىس اۋدانىندا ۇيىمداستىرىلعان سايىستا قازىنالى قارتتار قاناتتى ءسوز ايتۋدان سىنعا ءتۇستى، دەپ حابارلايدى قازاقپارات ءتىلشىسى.

شارا ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىن جۇزەگە اسىرۋ اياسىندا ءوتتى.

ماقساتى - كوپتى كورگەن داناگوي قارتتارىمىزدىڭ ونەگەلى ءومىرىن ۇلگى ەتە وتىرىپ، عيبرات بولارلىق سوزدەرىن جاس ۇرپاقتىڭ بويىنا ءسىڭىرۋ.

سونداي-اق اسىل قازىنا قاريالاردىڭ بويىنداعى قاسيەتتەرىن دارىپتەۋ ارقىلى جاستاردى يماندىلىققا تاربيەلەۋ، ۇلكەنگە قۇرمەت، كىشىگە ىزەت كورسەتۋدى ۇيرەتۋ.

بايقاۋ تالاپتارى بويىنشا جارىسقا 60 جاستان اسقان اقساقالدار مەن ەل اعالارى قاتىستى. ولار ماقال-ماتەل مەن ونەگەلى-وسيەت سوزدەر ايتۋدان سايىستى.

باتا بەرۋ مەن ونەر بايقاۋىنان باقتارىن سىناپ كوردى. اۋىل اقساقالدارى، سونداي-اق توسىننان قويىلعان سۇراقتارعا اتالى سوزبەن جاۋاپ قايتارىپ، ءار باعىتتا بەرىلەتىن باتالاردىڭ ءمانىن ءتۇسىندىرىپ وتىردى. سايىس قورتىندىسىمەن قازىلار القاسى ءبىرىنشى ورىنعا اقدالا اۋىل وكرۋگىنەن كەلگەن بالعىنباي پەردەبەكتى لايىق دەپ تاپتى.

ال ەكىنشى ورىن اۋداندىق ارداگەرلەر ۇيىمىنىڭ اتىنان قاتىسقان سامارحان بايداۋلەتوۆ پەن جاڭاباي ەركەيەۆتەرگە بۇيىردى.

ءۇشىنشى ورىندى دەرمەنە اۋىلىنىڭ قارياسى مۇرات نۇرتانوۆ پەن ارىس قالاسىنىڭ اقساقالى تىنىشتىق كاربوزوۆتار يەلەندى.

جەڭىمپاز قاريالارعا العىس حاتتار مەن باعالى سىيلىقتار بەرىلدى.

اۆتور: اينۇر اقبايەۆا