وسكەمەندە مۇسىلماندار بەيىتى ءبىر ۇلگىدە تۇرعىزىلا باستادى
وسكەمەننىڭ ىرگەسىندەگى سامسونوۆكا اۋىلىنىڭ ماڭىندا ورنالاسقان مۇسىلماندار زيراتى سوڭعى جىلداردان بەرى بىركەلكى ەتىلىپ، ءبىرىڭعاي تارتىپپەن تۇرعىزىلىپ كەلەدى. ءبىرى بەيىتتى كۇمبەز ەتىپ كوتەرىپ، ەكىنشىسى ودان اسىپ ءتۇسىپ، اسقاقتاعان زيرات سالاتىن قازىرگى زاماندا، وبلىس ورتالىعىنداعى مۇسىلماندار زيراتىندا قولعا الىنعان جاڭا جۇيە حالىقتىڭ كوكەيىندە جۇرگەن كوپ ساۋالعا تابىلعان ءبىر جاۋاپ بولدى.
«ءبىزدىڭ وبلىستا ءار اۋدانداردىڭ وزىندە جەرلەۋ جورالعىلارى بىردەي ەمەس. بىرەۋلەر جەردىڭ ىڭعايىنا قاراي، ەندى بىرەۋلەر قۇرىلىس ماتەريالدارىنىڭ تۇرىنە قاراي قابىردى، بەيىتتى ءارتۇرلى ەتىپ قازىپ، كوتەرىپ جاتادى. سوندىقتان بەيىتتەردى جيناۋدا شاريعات تالاپتارىنا ساي مۇسىلماندىق جورالعىلار ساقتالىپ، قامتىلسىن دەگەن شارت ەڭ باستى ماقساتىمىز بولدى»، - دەيدى سامسونوۆكا اۋىلىنىڭ جانىنداعى بەيىتتەردى رەتكە كەلتىرىپ، جۇرتقا وسى مۇسىلماندار زيراتى جابدىعىنىڭ قىزمەتىن كورسەتىپ وتىرعان جەكە كاسىپكەرلىكتىڭ يەسى باۋىرجان قۇسايىنوۆ.
بەيىتتەردى ءبىرىڭعاي ەتىپ تۇرعىزۋعا العاشقىدا ءبىردى-ەكىلى ادام قارسى بولعانىمەن، بىرتە- بىرتە جاڭا ەرەجەگە كەلىسىم بەرگەن.
بۇدان بولەك، جەرلەۋگە اكەلىنگەن ادامدار تىركەلىپ، ولاردىڭ قانداي اۋرۋدان، نەدەن كوز جۇمعانى كورسەتىلىپ وتىرادى. تىركەۋ جۋرنالىندا قاي قاتاردا، قانداي نومىرگە قويىلعانى دا قوسا جازىلىپ تۇرادى.
سونداي-اق سامسونوۆكاداعى مۇسىلماندار بەيىتىندە قوعام قايراتكەرلەرى مەن تانىمال تۇلعالار جەرلەنەتىن «قۇرمەتتى ازاماتتار اللەياسىن» جاساۋ كوزدەلگەن. بوشاي اتا، اسىلبەك سابەكوۆ، قانيپا بىتىبايەۆا سىندى ەل قۇرمەتىنە بولەنىپ، ەڭبەگى سىڭگەن جاندار دامىلداپ جاتقان بەيىتتەر ءقازىر مۇندا ءبىر بولەك، وقشاۋ تۇر. قاتارى كوبەيىپ كەلە جاتقان ونداعى زيراتتاردىڭ كوپشىلىگى گرانيتتەن تۇرعىزىلۋدا. قالالىق اكىمدىكتەن، مەكەمەلەردەن تىل ەڭبەككەرلەرىن، ۇلى وتان سوعىسى، اۋعان سوعىسى ارداگەرلەرىن دە وسى جەرگە جەرلەۋگە وتىنىشتەر كەلىپ ءتۇسىپ جاتادى ەكەن.
سامسونوۆكاداعى زيراتقا ايىنا - 25-30، جىلىنا 300 گە جۋىق ادام جەر قوينىنا تاپسىرىلادى.
انىقتالعانداي، بىركەلكى ەتىپ جينالىپ جاتقان بەيىتتەردى كوتەرۋگە 178 -225 مىڭ تەڭگە كولەمىندە قارجى كەتەدى. بەلگى تاسى، باسىندا ايى، ءتورت جاعىندا شارلارى بار ءبىرىڭعاي ۇلگىدەگى بەيىتتەردى سالۋعا، ماتەريالدارىنا 225 مىڭ تەڭگە جۇمسالادى. ەسىك جانە باسقا دا قوسىمشا ساۋلەتتىك نىشاندار قويعىسى كەلگەندەر ۇستىنەن تاعى اقشا تولەيدى.
باۋىرجان قۇسايىنوۆ اتاپ كورسەتكەندەي، «جەر قاتىناستارى تۋرالى» قازاقستان زاڭىنىڭ 139-بابىندا ومىردەن قايتقان قازاقستان ازاماتىنا 6 شارشى مەتر تەگىن جەر بەرىلەتىندىگى جازىلعان. ياعني قازا بولعان ادامدارعا جەر تەگىن بەرىلەدى. ال جەردىڭ ساتىلىپ جاتقاندىعى تۋرالى اڭگىمەلەر قاۋەسەت بولىپ تابىلادى.
15 گەكتار جەردەگى سامسونوۆكا ماڭىنداعى مۇسىلمان زيراتىنىڭ اۋماعى 20 جىلعا دەيىن پايدالانۋعا جەتەدى ەكەن. كەيىن ونىڭ جانىنداعى بوس تۇرعان 35 گەكتار جەر دە زيرات ماقساتىندا پايدالانۋعا قوسىلىپ بەرىلۋى مۇمكىن.