بولاشاق قۇقىقتانۋشىلاردىڭ رەسپۋبليكالىق وليمپياداسى ءوتتى

شىمكەنت. قازاقپارات - شىمكەنتتە قۇقىق سالاسى بويىنشا وتكەن رەسپۋبليكالىق وليمپيادا ءوز مارەسىنە جەتتى.

ەلىمىزدەگى جوعارى وقۋ ورىندارىنىڭ ستۋدەنتتەرى اراسىندا ۇيىمداستىرىلعان ءبىلىم سايىسى ەلباسىنىڭ كەزەكتى جولداۋى اياسىندا وتكىزىلىپ وتىر، دەپ حابارلايدى قازاقپارات ءتىلشىسى.

«قۇقىقتىق مەملەكەت قۇرۋداعى قىلمىستىق زاڭنامانىڭ وزەكتىلىگى» اتتى سايىسقا الماتى، استانا،  قىزىلوردا، تۇركىستان مەن شىمكەنت قالالارىنان 8 كوماندا قاتىستى.

شارا بارىسىندا شىم شاھارعا قاراستى ەڭبەكشى اۋداندىق سوتىنىڭ ءتوراعاسى ايدوس سۇلتانوۆ بىلىمگەرلەرگە ءوز كەڭەسىن بەردى. ەلىمىزدە قولعا الىنعان جاڭا جوبالاردىڭ تيىمدىلىگىنە توقتالىپ، جاستاردى بىلىكتى مامان بولۋعا شاقىردى.

زاڭ سالاسىنىڭ شاكىرتتەرى بايقاۋ بارىسىندا وزدەرىنىڭ تەوريادا العان بىلىمدەرىن تاجىريبە جۇزىندە كورسەتىپ باقتى. ۆيكتورينالىق سۇراقتارعا جاۋاپ بەرىپ، وي تاپقىرلىعى مەن جۇيرىكتىگىن كورسەتتى.

بىرنەشە كەزەڭنەن تۇرعان سايىستا ستۋدەنتتەر سوت شەشىمدەرىنىڭ دۇرىس-بۇرىستىعىن سارالادى.

قورىتىندىسىندا، ءۇشىنشى ورىندى «ادىلەت» جانە «زاڭگەر» كوماندالارى بولىسسە، ەكىنشى ورىندى «ساقشىلار» كومانداسى جەڭىپ الدى.

ءبىرىنشى ورىنعا ايماقتىق الەۋمەتتىك ۋنيۆەرسيتەتتىڭ «جەتى جارعى» كومانداسى لايىق دەپ تابىلدى. باس جۇلدەنى استانالىق كوماندا يەلەندى.

ايتا كەتەيىك، ەلىمىزدە قۇقىق ءپانى بويىنشا جىل سايىن ءتۇرلى سايىستار وتكىزىلەدى. بۇل بايقاۋ شىمكەنت قالاسىندا العاش رەت ۇيىمداستىرىلىپ وتىر. سايىس قورىتىندىسىنا ساي، ۇزدىك دەپ تانىلعان كوماندالار ارنايى سىي-سياپاتتارمەن ماراپاتتالدى.

اۆتور: اينۇر اقبايەۆا