استانادا شەرتپە كۇيشىگە ارنالعان «قوڭىر» اتتى كۇي كەشى وتەدى
ابىكەن حاسەنوۆ - قازاقتىڭ شەرتپە كۇي ونەرىنىڭ كاسىبي مەكتەبىنىڭ ىرگەتاسىن قالاعان ۇلى كۇيشى.
ونىڭ «قوڭىر» اتتى كۇيى ءوزى ءومىر سۇرگەن تار كەزەڭنىڭ اۋىرتپاشىلىعىن سۋرەتتەيدى.
1934-جىلدان باستاپ قازاق اكادەميالىق دراما تەاترىنىڭ اكتەرى بولىپ ەڭبەك ەتكەن. كوپتەگەن وبرازداردى سومداعان تەاتر تارلانى رەتىندە اتى تاريحتا قالعان. ابىكەن حاسەنوۆ تاتتىمبەت، يتاياق، ماقاش، سەمبەك، قىزداربەك، ءابدي سياقتى حالىق كۇيشىلەرىنىڭ مۇرالارىن كۇيتاباققا جازىپ قالدىرعان.
شەرتپە كۇيدىڭ مايتالمان شەبەرىن س. سەيفۋللين، س. مۇقانوۆ، ع. مۇسىرەپوۆ، ع. مۇستافين سىندى كلاسسيك قالامگەرلەر ءسۇيىپ تىڭداعان. ابىكەننىڭ ەسىمى ا. جۇبانوۆتىڭ مونوگرافياسىندا اتالعان.
«قازاقتىڭ ۇلى كۇيشىلەرىنىڭ ءبىرى، تاتتىمبەت مەكتەبىنىڭ وزىق وكىلى ابىكەن حاسەنوۆتىڭ ءومىر سۇرگەن كەزەڭى زار زامان ەمەس، كەر زامان بولدى. الماتىعا ابىكەن ساكەن سەيفۋلليندى ساعالاپ بارادى. ساكەن ابىكەندى جاقسى قارسى الىپ، قامقور بولىپ، ونى جاڭادان اشىلعان قازاق دراما تەاترىنا ارتىستىك قىزمەتكە ورنالاستىرادى. ابىكەن وسى تەاتردا ءومىرىنىڭ سوڭىنا دەيىن قىزمەت ەتتى. بۇل سالاداعى ەڭبەگى ەلەنىپ، مەملەكەتتىك ماراپاتتار دا الدى. قازاقتىڭ تەاتر ونەرىنىڭ ىرگەتاسىن قالاعان اعا بۋىن وكىلدەرىنىڭ اراسىندا ابىكەن حاسەنوۆتىڭ ەسىمى دە قۇرمەتپەن اتالادى. ونىڭ اكتەرلىك شەبەرلىگىنىڭ تەاترتانۋشىلار تاراپىنان ايتىلماي قالعان كەزى جوق. تەاتردا قىزمەتتە جۇرگەندە ابىكەننىڭ الاپات كۇيشىلىگى الماتىعا جايىلدى» دەيدى وسى كەشتى ۇيىمداستىرۋشى، بەلگىلى كۇيشى، ق ر ەڭبەك سىڭىرگەن قايراتكەرى جانعالي ءجۇزباي.
ال استانادا وتەتىن كۇي كەشىنە استانا مەن قاراعاندى قالالارىنان ءبىرقاتار بەلگىلى كۇيشىلەر مەن انشىلەر قاتىسادى.
اتاپ ايتساق، قالكەن قاسىموۆ، «كۇي-كەرۋەن» شەرتپە كۇي ورتالىعىنىڭ باسشىسى قايروللا ءسادۋاقاسوۆ، قاپاش قۇلىشەۆا، سەكەن تۇرىسبەك، رىمحان ءابىلحان ۇلى، ەدىل باسىعارايەۆ، قايرات ايتبايەۆ، ت. ب. ونەرپازدار كۇي شەرتىپ، ءان سالادى.