الەمگە ايگىلى جيھانكەز ياسەك پالكەۆيچ: ماركو پولونىڭ ىزىمەن قازاقستاندى ارالاپ وتەمىن

None
None
استانا. قازاقپارات - الەمگە ايگىلى پولياك جيھانكەزى ياسەك پالكەۆيچ «ۇلى جىبەك جولى» برەندى، قازاقستاننىڭ تۋريستىك الەۋەتى مەن ەۋروپا، ازيا ەلدەرى كىرەتىن تۋريستىك وداق قۇرۋدىڭ ماڭىزى تۋرالى ايتىپ بەردى، دەپ حابارلايدى «قازاقپارات» ح ا ا ءتىلشىسى.

ەسكە سالا كەتسەك، 2018 -جىلى قىتايدان اتتانىپ، پولشادا مارەسىنە جەتەتىن «جاڭا ۇلى جىبەك جولى» حالىقارالىق ەكسپەديتسياسى قازاقستاننىڭ كيەلى ورىندارىن باسىپ وتپەك.

«جاڭا ۇلى جىبەك جولى» حالىقارالىق ەكسپەديتسياسى ق ر مادەنيەت جانە سپورت مينيسترلىگىنىڭ قولداۋىمەن جۇزەگە اسىرىلماق. ەكسپەديتسيانىڭ جەتەكشىسى - الەمگە ايگىلى جيھانگەر - ياسەك پالكەۆيچ.

ياسەك پالكەۆيچتىڭ گوبي جانە ساحارا شولدەرىن باسىپ ءوتىپ، ونداعان اۋىر ەكسپەديتسيالاردى ارتقا تاستاپ، ناميبياداعى سۇيەك جاعالاۋى جانە ۇلى امازونكا وزەنىنىڭ ناقتى باستاۋىن انىقتاعان عالىم ەكەنىن ايتا كەتۋ كەرەك. وسى ەكسپەديتسيا بارىسىندا ول 10 مىڭ شاقىرىمعا جۋىق جەردى قىتاي، قىرعىزستان، وزبەكستان، قازاقستان جانە رەسەي، بەلارۋس پەن پولشا ارقىلى ءوتۋدى جوسپارلاپ وتىر.

و ك ق- دا وتكەن باسپا ءسوز ءماسليحاتىندا ياسەك پالكەۆيچ حالىقارالىق ەكسپەديتسيانى ۇيىمداستىرىپ وتىرعان قازاقستاندىق تاراپقا زور العىسىن ءبىلدىردى.

««ۇلى جىبەك جولى» كونە زاماندا تەك قانا ساۋدا باعدارى بولعان جوق. ول ەۋرازيا ەلدەرىنىڭ مادەنيەتىن بايلانىستىرعان بىرەگەي باعدار ەدى. ءوزىنىڭ قايتالانباس تاريحىمەن «ۇلى جىبەك جولى» مەنى بۇرىننان قىزىقتىراتىن. «جاڭا ۇلى جىبەك جولى» حالىقارالىق ەكسپەديتسياسىنىڭ ماقساتى نە دەگەن سۇراقتى كوپشىلىك سۇراپ جاتىر. ءبىز وسى جولدى ءجۇرىپ ءوتىپ، تاريحتى جاڭعىرتقىمىز كەلەدى. مادەني كوكجيەكتەردى كەڭەيتىپ، ەلدەردىڭ بايلانىسىنا ۇلەس قوسساق دەيمىز. قازاقستان سەكىلدى پولشادا دا كيەلى وڭىرلەر جەتەرلىك. كوپ ادامدار بۇل ورتالىق ازيا، وندا پولشانىڭ وعان قانداي قاتىسى بار دەپ سۇرايدى.

ءبىراق، تاريحي بايلانىستاردى ەشكىم جوققا شىعارا المايدى. ۇلى جىبەك جولىنداعى ساۋداگەرلەر كيەۆ ارقىلى پولشاعا جول تارتقان. دەمەك، تاريحي بايلانىس ەرتەدەن قالىپتاسقان. مەن ۇلگى تۇتاتىن تۇلعا - ۇلى جىبەك جولىمەن ءجۇرىپ وتكەن ماركو پولو. سول تاريحي تۇلعانىڭ ىزىمەن قازاقستان جەرىن ارالاپ وتەمىن»، - دەيدى ول.

جيھانكەزدىڭ ايتۋىنشا، «Kazakh Tourism» ۇلتتىق كومپانياسى» ا ق- نىڭ كوتەرگەن باستاماسى بويىنشا، ۇلى جىبەك جولى بويىنداعى مەملەكەتتەردىڭ تۋريستىك وداعىن قۇرۋدىڭ ماڭىزى زور.

«ۇلى جىبەك جولى - كونە تاريحتان بەرى كەلە جاتقان ەڭ ايگىلى ساۋدا ماركاسى. ءتىپتى، «ۇلى جىبەك جولىنىڭ» بىرەگەيلىگى «ديسنەي» نەمەسە «كوكا-كولا» سەكىلدى برەندتەردەن دە قىزىقتى ءارى الەۋەتتى بولۋى دا مۇمكىن. مۇنى تەك الەم حالقىنا كورسەتە ءبىلۋ كەرەك. سوندىقتان، حالىقارالىق «ۇلى جىبەك جولى» برەندى ارقىلى حالىقارالىق پلاتفورما قۇرۋدىڭ ماڭىزى زور دەپ ايتار ەدىم»، - دەيدى ول.

ياسەك پالكەۆيچ، سونىمەن بىرگە، قازاقستانعا بىرنەشە رەت كەلە وتىرىپ، مۇنداعى حالىقتىڭ بابالاردىڭ مۇراسى مەن داستۇرىنە ادالدىعىن ەرەكشە بايقاعانىن ايتادى.

«الەم ەلدەرىن ارالاپ ءجۇرىپ، كوپتەگەن ەلدەردە وتكەنگە دەگەن وسىناۋ قۇرمەتتى كورە بەرمەيمىن. ەۋروپا بۇگىنگى تاڭدا قازاقستان سەكىلدى الىپ مەملەكەت بار ەكەنىن، ونىڭ استاناسى كوركەم قالالاردىڭ ءبىرى ەكەنىن تانىپ ءبىلدى. 10 جىل بۇرىن بۇل مەملەكەت تۋرالى ەۋروپا ەلدەرى بىلە بەرمەيتىن. ورتالىق ازيادا قازاقستاننىڭ كوشباسشى ەكەنىن دە، مەملەكەتتىك بيىك دارەجەگە كوتەرگەن نۇرسۇلتان نازاربايەۆتى جاقسى بىلەدى»، - دەيدى ياسەك پالكەۆيچ.

 

سوڭعى جاڭالىقتار