پولشاعا باراتىن قىتايدىڭ ەكسپەديتسياسى قازاقستاننىڭ كيەلى جەرلەرىمەن وتەدى
بۇل تۋرالى «Kazakh Tourism» ۇلتتىق كومپانياسى» ا ق باسقارما ءتوراعاسىنىڭ ورىنباسارى تيمۋر دۇيسەنعاليەۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.
«جاڭا ۇلى جىبەك جولى» حالىقارالىق ەكسپەديتسياسى ق ر مادەنيەت جانە سپورت مينيسترلىگىنىڭ قولداۋىمەن جۇزەگە اسىرىلماق. ەكسپەديتسيانىڭ جەتەكشىسى - الەمگە ايگىلى جيھانگەز ياتسەك پالكيەۆيچ. ياتسەك پالكيەۆيچتىڭ گوبي جانە ساحارا شولدەرىن كەسىپ وتكەن ونداعان اۋىر ەكسپەديتسيالاردى ارتتا تاستاپ، ناميبياداعى سۇيەك جاعالاۋى جانە ۇلى امازونكا وزەنىنىڭ ناقتى باستاۋىن انىقتاعان عالىم ەكەنىن ايتا كەتۋ كەرەك.
وسى ەكسپەديتسيا بارىسىندا ول قىتاي، قىرعىزستان، وزبەكستان، قازاقستان جانە رەسەي، بەلارۋس پەن پولشا ارقىلى 10 مىڭ شاقىرىم قاشىقتىقتى ءجۇرىپ ءوتۋدى كوزدەپ وتىر.
العا قويعان ماقساتى - ۇلى جىبەك جولىنىڭ مارتەبەسىن قايتارۋ، جانداندىرۋ جانە ازيا مەن ەۋروپا اراسىنداعى ساۋدا كەرۋەندەرى ارقىلى قاتىناسقان ەلدەردىڭ مادەني بايلانىسىن نىعايتۋ.
«قازىرگى ۋاقىتتا قازاقستاندا كيەلى ەسكەرتكىشتەردى ساقتاۋ باعىتىندا باعدارلامانىڭ ىسكە اسىپ جاتقانى مەنى تاڭداندىردى. بۇل جايلى مەن ەكسپەديتسيا سەرىكتەستەرى - قازاق عىلىمي- زەرتتەۋ مادەنيەت ينستيتۋتىنان ءبىلدىم. ءبىزدىڭ ەكسپەديتسيامىزدىڭ باعىتى وسى جولدار ارقىلى وتەدى، سەبەبى تەك سول جولسەرىكتەرىمىز عانا ۇلى جىبەك جولىنىڭ تاريحىنان سىر شەرتە الادى. بىزگە سول ءداۋىردىڭ رۋحىن سىيلاي الادى. «قازاقستاننىڭ قاسيەتتى گەوگرافياسى» بۇكىل الەم تۋريستەرى ءۇشىن ۇلكەن مۇمكىندىككە اينالاتىنىنا سەنىمدىمىن»- دەيدى ياتسەك پالكيەۆيچ.
«Kazakh Tourism» ۇلتتىق كومپانياسى» اق باسقارما ءتوراعاسىنىڭ ورىنباسارى تيمۋر دۇيسەنعاليەۆتىڭ ايتۋىنشا، قازاقستاندا تۋريزم سالاسىن دامىتۋ ءۇشىن ياتسەك پالكيەۆيچ سەكىلدى الەم حالقى قۇلاق اساتىن جيھانگەزدى شاقىرۋدىڭ ماڭىزى زور.
سەبەبى، الەمگە ايگىلى جيھانگەز وڭتۇستىك امەريكاداعى امازونكا وزەنىنىڭ باستالاتىن قاينار كوزىن ءبىرىنشى بولىپ تاپقان ادام ەكەن.
«ەكسپو ارقىلى بۇكىل الەمنىڭ قازاقستانعا دەگەن قىزىعۋشىلىعى ارتا ءتۇستى. ەندىگى كەزەكتە ءبىز قازاقستان تەك قانا ونەركاسىپتىك سالادا عانا ەمەس، تۋريزم سالاسىندا وزىق ەل ەكەنىن تانىتۋ جوسپارلانعان. ياتسەك پالكيەۆيچ باستاعان ەكسپەديتسيا 10 مىڭ شاقىرىمدى باعىندىرادى. كۇنى كەشە عانا ءبىز ەكسپەديتسيانىڭ الدىن الا جوسپارلى جولىنىڭ جوباسىن جاسادىق.
ءبىزدىڭ جوسپار بويىنشا ەكسپەديتسيالىق توپ قىتايدان قازاقستانعا قورعاس وڭىرىنەن كىرىپ، ودان بەرى ەسىك، تامعالى تاستارى ەسكەرتكىشتەرى تۇرعان جەردەن قىرعىزستاننىڭ بىشكەك قالاسىنا بارادى، ول جاقتان وزبەكستانعا جول تارتىپ، تاريحي بۇقارا، سامارا، حيۋا قالالارىن كەسىپ وتەدى. وزبەك جەرى ارقىلى وڭتۇستىك قازاقستاننىڭ وتىرار، سامارقان ەسكى شاھارلارى ارقىلى بالقاش وڭىرىنە كەلىپ، ول جەردە استاناعا جولعا شىعادى. ەلوردادان بۋراباي مەن قوستاناي ارقىلى رەسەيدىڭ چەليابينسك قالاسىنا اتتانادى. ءبىز ەكسپەديتسيا ارقىلى بارلىق ەسكەرتكىشتەرىمىزدى كورسەتكىمىز كەلەدى»، - دەيدى تيمۋر دۇيسەنعاليەۆ.
قازىر حالىقارالىق ەكسپەديتسيانىڭ قۇرامىندا قازاقستاندىق تاراپتان قانداي وكىلدەر ەنەتىنى انىقتالىپ جاتىر.