نىعماتۋلين قارجى مينيسترىنە: قارىزدى بەرگەننەن كەيىن، ۋاقىتىندا قايتارا ءبىلۋ كەرەك
استانا. قازاقپارات - بۇگىن پالاتانىڭ كەزەكتى جالپى وتىرىسىندا ءماجىلىس ءتوراعاسى نۇرلان نىعماتۋلين باسقا ەلدەردىڭ قازاقستانعا قايتارۋعا ءتيىس بەرەشەكتەرىن ۋاقىتىندا رەتتەۋ كەرەكتىگىنە نازار اۋداردى.
ناقتىلاپ ايتقاندا بۇل ماسەلە قازاقستان ۇكىمەتىنىڭ گرۋزيا ۇكىمەتىنە بەرگەن مەملەكەتتىك كرەديتتەرىن قايتا قۇرىلىمداۋعا قاتىستى راتيفيكاتسيالىق زاڭ جوباسىن تالقىلاۋ كەزىندە كوتەرىلدى، دەپ حابارلايدى ءماجىلىستىڭ باسپا ءسوز قىزمەتى.
ماسەلەن، دەپۋتات يرينا ۋنجاكوۆا گرۋزيا ۇكىمەتىنىڭ بەرەشەكتى قايتارماۋعا قاتىستى جاعدايى 20 جىلدان اسىپ بارا جاتقانىن اتاپ ايتتى.
وسىدان كەيىن ءماجىلىس سپيكەرى قارجى ءمينيسترى باقىت سۇلتانوۆقا: «گرۋزيندىك ارىپتەستەرمەن قارىز ماسەلەسىنىڭ رەتتەلگەنى جاقسى، دەگەنمەن، بۇل بوساڭسۋعا سەبەپ بولماۋى كەرەك. ويتكەنى، باسقا ەلدەرمەن قارىزدار بويىنشا ءالى رەتتەلمەگەن سۇراقتار بار»، - دەدى.
سونداي-اق، ءماجىلىس ءتوراعاسى قايتارىلعان قارجىلار بيۋدجەت قورجىنىن تولتىرۋ كەرەكتىگىن باسا ايتتى.
«قارىزدى بەرگەننەن كەيىن، ۋاقىتىندا قايتارا ءبىلۋ كەرەك»، - دەدى ول.