گرۋزيانىڭ قازاقستانعا قارىزى قاشان قايتارىلادى

استانا. قازاقپارات - پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ الدىنداعى گرۋزيا ۇكىمەتىنىڭ بەرەشەگىن قايتادان قايتا قۇرىلىمداۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن ماقۇلدادى،

 دەپ حابارلايدى قازاقپارات.

«گرۋزيا ۇكىمەتىنىڭ قازاقستان ۇكىمەتىنىڭ الدىنداعى بورىشى 27 ميلليون 774 مىڭ ا ق ش دوللارىن قۇرايدى. ول 1992-1993 -جىلدارى ەكى ەلدىڭ ۇلتتىق بانكتەرى اراسىندا ءوزارا ەسەپ ايىرىسۋ ناتيجەسىندە پايدا بولدى جانە مەملەكەتتىك نەسيە رەتىندە قايتا راسىمدەلدى. قايتادان قايتا قۇرىلىمداۋ تۋرالى كەلىسىمگە سايكەس، گرۋزين تاراپى قازاقستان الدىنداعى بەرەشەگىن ءتيىستى شارتتار بويىنشا وتەيدى»، - دەدى ق ر قارجى ءمينيسترى باقىت سۇلتانوۆ.

ءمينيستردىڭ سوزىنە قاراعاندا، پايىزدىق مولشەرلەمە جىلدىق 4 پايىزدىق دەڭگەيدە ساقتالادى. سونىمەن قاتار بەرەشەكتى وتەۋ كەستەسى مەرزىمىن وتكىزگەنى ءۇشىن جينالعان ءوسىم پۇلدى ەسەپكە المايدى جانە پاريج كلۋبى ۇسىنىستارىنا سايكەس ۇزارتىلادى.

«وسىلايشا، 2017 -جىلعى كەلىسىمگە سايكەس 2017-2025 -جىلدارداعى كەزەڭگە گرۋزيا تاراپىنىڭ تولەمدەر سوماسى 37 ميلليون 997 مىڭ 815 ا ق ش دوللارىن قۇرايدى»، - دەدى قارجى ءمينيسترى. تالقىلاۋلاردان كەيىن پالاتا دەپۋتاتتارى زاڭ جوباسىن ماقۇلدادى.

 اۆتور: رۋسلان عابباسوۆ