ءماجىلىس رەسپۋبليكالىق بيۋدجەت تۋرالى سەنات ەنگىزگەن وزگەرىستەرمەن كەلىستى
دەپ حابارلايدى قازاقپارات.
وسىلايشا، پارلامەنت اتالعان قۇجاتتى قابىلدادى. ەندى زاڭ مەملەكەت باسشىسىنىڭ قول قويۋىنا جولدانادى. 16 - قاراشادا پارلامەنت سەناتىنىڭ جالپى وتىرىسىندا پالاتا دەپۋتاتتارى «2018-2020 -جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن تالقىلادى. قۇجاتقا وزگەرىستەر ەنگىزىلگەندىكتەن، زاڭ جوباسى ماجىلىسكە قايتارىلدى. زاڭ جوباسىن تالقىلاۋ بارىسىندا سەنات كوميتەتتەرىنەن جانە جەكەلەگەن دەپۋتاتتاردان زاڭ جوباسىنا مەملەكەت تىرشىلىگىنىڭ ءتۇرلى سالالارىنا قاتىستى وزگەرىستەر مەن تولىقتىرۋلار جونىندە ۇسىنىستار كەلىپ تۇسكەن بولاتىن.
تۇتاستاي العاندا 85,6 ميلليارد تەڭگە سوماسىنا، ونىڭ ىشىندە 2018 -جىلى 22 ميلليارد تەڭگەگە ۇسىنىستار قولداۋ تاپتى. وسى ۇسىنىستاردى قارجىلاندىرۋ 2018 -جىلى ۇكىمەت رەزەرۆىنىڭ باستاپقى جوسپارلانعان سوماسىن 4,8 ميلليارد تەڭگەگە ازايتۋ جانە «قۇرىق» پورتىنداعى قۇرىلىسقا كوزدەلگەن شىعىستاردى 16,9 ميلليارد تەڭگەگە كەمىتۋ، ىشكى ىستەر مينيسترلىگىنىڭ 0,4 ميلليارد تەڭگە سوماسىنداعى قاراجاتىن قايتا ءبولۋ ەسەبىنەن جۇزەگە اسىرىلماق. 2019-2020 -جىلدارى جاڭا باستامالارعا شىعىستار ازايتىلاتىن بولادى.
وزگەرىستەر بويىنشا ۇسىنىستار مىنا باعىتتاردى قارجىلاندىرۋ ماسەلەلەرىن كوزدەيدى: ىشكى ىستەر مينيسترلىگىنىڭ قۇرىلىمدىق بولىمشەلەرى مەن گيدرومەتەورولوگيالىق قىزمەتتى ماتەريالدىق- تەحنيكالىق جاراقتاندىرۋ؛ وڭتۇستىك قازاقستان، قىزىلوردا جانە اقتوبە وبلىستارىنىڭ ەكولوگيالىق قولايسىز اۋداندارىنىڭ تۇرعىندارىنا ۇستەماقىلار بويىنشا بەرەشەكتى وتەۋ؛ ەلىمىزدىڭ ءتۇرلى وڭىرلەرىندە دەنساۋلىق ساقتاۋ، سپورت نىساندارىن سالۋ؛ تۇرعىن ۇيلەردى، سۋمەن جابدىقتاۋ نىساندارىن، ينجەنەرلىك جەلىلەردى جانە گازبەن جابدىقتاۋ جەلىلەرىن سالۋ؛ وزەندەردىڭ سۋىن مولايتۋ جۇمىستارىن جۇرگىزۋ؛ قازاق ءالىپبيىنىڭ لاتىن قارپىنە كوشۋ جونىندەگى ءىس- شارالاردى ىسكە اسىرۋ مەن وزگە دە جالپى مەملەكەتتىك جۇمىستار.
اۆتور: رۋسلان عابباسوۆ