قازاقستاندا اۆتوموبيل قۇراستىرۋ ارتىپ كەلەدى
«اعىمداعى جىلدىڭ 10 ايىنىڭ قورىتىندىسىندا قازاقستاندا جالپى قۇنى 115,2 ميلليارد تەڭگەنى قۇرايتىن 15014 اۆتوكولىك قۇرالى (جەڭىل، جۇك كولىكتەرى، اۆتوبۋستار، ارنايى ماقساتتاعى ماشينالار جانە تىركەمەلەر) شىعارىلدى»، - دەلىنگەن «قاز اۆتو ونەركاسىپ» قازاقستاننىڭ اۆتوموبيل سالاسى كاسىپورىندارىنىڭ وداعى تاراتقان اقپاراتتا. تاراتىلعان مالىمەتتەرگە سايكەس، شىعارىلعان كولىكتەردىڭ كولەمى وتكەن جىلدىڭ سايكەس كەزەڭىنەن 2,7 ەسەگە ارتىپ وتىر. جەڭىل كولىكتەردى قۇراستىرۋ 3,3 ەسەگە ۇلعايىپ، 12986 بىرلىككە جەتكەن. اتالعان كولىكتەردىڭ 72,4 پايىزى «ازيا اۆتو»، ال 27,6 پايىزى «سارى ارقا اۆتو ونەركاسىپ» كاسىپورنىنا تيەسىلى.
ەسەپتى كەزەڭدە 545 اۆتوبۋس شىعارىلدى. بۇل وتكەن جىلعى كورسەتكىشتەن 3,3 ەسەگە ارتىق. ال ارنايى ماقساتتاعى 182 كولىك قۇراستىرىلىپ، وتكەن جىلداعى كورسەتكىشتەن 1,7 ەسەگە جوعارى بولدى. 1117 جۇك كولىگى قۇراستىرىلدى. وڭىرلىك شەكتە كولىكتەردىڭ 64,1 پايىزى شىعىس قازاقستان وبلىسىندا، 26,6 پايىزى قوستاناي وبلىسىندا، 4,1 پايىزى اقمولا وبلىسىندا، 2,8 پايىزى الماتى قالاسىندا جانە 0,03 پايىزى قاراعاندى وبلىسىندا شىعارىلعان.
اۆتور: مارلان جيەمباي