رەسەي بياتلون بويىنشا الەم كۋبوگىنان شەتتەتىلدى

 استانا. قازاقپارات - حالىقارالىق بياتلونشىلار وداعىنىڭ (IBU) اتقارۋشى كوميتەتى 2018-19-جىلعى الەم كۋبوگىنىڭ كەستەسىنە رەسەيدە وتەتىن كەزەڭدى كىرگىزبەۋگە شەشىم قابىلدادى.

بۇل تۋرالى وداقتىڭ سايتىندا حابارلاندى.

الەم كۋبوگىنىڭ كۇنتىزبەسى توعىز كەزەڭنەن تۇرادى، ونىڭ ءبىرىنشىسى سلوۆەنيانىڭ پوكليۋك قالاسىندا 2018-جىلدىڭ 3-9- جەلتوقسانى ارالىعىندا، ال سوڭعىسى 2019-جىلعى 18-24- ناۋرىز ارالىعىندا نورۆەگيا استاناسى وسلودا وتەتىن بولدى.

و باستا تۋرنيردىڭ سوڭعى كەزەڭى 2019-جىلعى 25- ناۋرىزدا تۇمەندە قورىتىندىلاناتىن بولىپ جوسپارلانعان ەدى.

ەسكە سالا كەتسەك، 2016-جىلدىڭ جەلتوقسانىندا WADA وتىزدان استام رەسەيلىك بياتلونشى تىيىم سالىنعان زاتتاردى پايدالاندى دەپ ايىپتاعان ەدى. ەندى 2017-جىلدىڭ ناۋرىزىندا «WADA كودەكسىنە سايكەس ەمەس» دەپ تانىلعان رەسەي تۇمەندە ءوتۋى ءتيىس 2021-جىلعى الەم بىرىنشىلىگىن قابىلداۋ قۇقىعىنان ايىرىلدى.