گەرمانيادان «ورالمان» فيلمى جۇلدەلى ورالدى
ودان بولەك، كينوفەستيۆالدىڭ ۇيىمداستىرۋشىلارى اتالعان كينوتۋىندىنى گەرمانيادا پروكاتقا شىعارۋعا ۇسىنىس جاسادى.
ەستەرىڭىزگە سالا كەتسەك، «قازاق فيلم» كينوستۋدياسى تۇسىرگەن رەجيسسەرى ءسابيت قۇرمانبەكوۆتىڭ «ورالمان» فيلمى اتالعان كينوفەستيۆالدىڭ نەگىزگى باعدارلاماسىنا ىرىكتەلىنىپ الىنعان بولاتىن.
بيىل فەستيۆالدىڭ باس جۇلدەسىنە 22 ەلدەن 21 كارتينا تالاسقا تۇسكەن. «مادەني جانە ءدىني وزگەشەلىكتەرىنە قاراماستان، ءوز ەلىنە قايتا ورالعان وتباسىنىڭ درامالىق وقيعاسى ەموتسيونالدى اسەرلى باياندالعانى ءۇشىن ماراپاتتالادى»، - دەلىنگەن فەستيۆالدىڭ رەسمي سايتىندا.
مانگەيم-گەيدەلبەرگ كينوفەستيۆالىنىڭ ناتيجەسى بويىنشا، بايقاۋدىڭ «ۇزدىك تولىق مەتراجدى فيلمى» اتتى باس جۇلدەسى رەجيسسەر ۆيتو پالميەريمنىڭ «تەحاستا كورىسەرمىز» اتتى يتاليالىق كارتيناعا بۇيىردى.
ال فيليپپيندىك رەجيسسەر باگانە فيول تۇسىرگەن «ورمانداعى سەرۋەن» فيلمى فەستيۆالدىڭ ارنايى جۇلدەسىمەن ماراپاتتالدى. سونىمەن قاتار، «كۇزەتشى» (دومينيكان رەسپۋبليكاسى، پۋەرتو-ريكو، برازيليا)، «قاسيەتتى اۋا» (يزرايل) جانە «مۇرتازا» (تۇركيا) اتتى فيلمدەر قازىلار القاسىنىڭ قۇرمەتتى سىيلىقتارىمەن ماراپاتتالدى.
66-حالىقارالىق مانگەيم- حايدەلبەرگ (International Filmfestival Mannheim-Heidelberg) كينوفەستيۆالىنىڭ حالىقارالىق قازىلار القاسىنىڭ قۇرامىنا گەرمانيانىڭ تانىمال كينەماتوگرافيستەرى - كلاۋديا لاندسبەرگەر، كريستيان يۋل لەمچە جانە كلەمەنس كلوپفەنشتەيندەر كىردى.
ەستەرىڭىزگە سالا كەتسەك، «ورالمان» كوركەم فيلمى وسى جىلدىڭ باسىندا يراننىڭ استاناسى تەگەراندا وتكەن 35-حالىقارالىق فادجر كينوفەستيۆالى مەن XIII حالىقارالىق «ەۋرازيا» كينوفەستيۆالىنىڭ باس جۇلدەسىن جەڭىپ العان بولاتىن.
فيلمدە باستى ءرولدى سومداعان اكتەر دۋلىعا اقمولدا قىركۇيەك ايىندا تاتارستاندا وتكەن XIII حالىقارالىق مۇسىلماندار كينوسى فەستيۆالىندە «ۇزدىك ەر ادام ءرولى» جۇلدەسىمەن ماراپاتتالدى.
سونداي-اق، كارتينا يتاليادا وتكەن ⅹⅹحالىقارالىق «Religion Today» كينوفەستيۆالىندە «ۇزدىك فيلم» نوميناتسياسىندا جەڭىسكە جەتىپ، تاۋەلسىز SIGNIS قازىلار القاسىنىڭ ارنايى جۇلدەسىن يەمدەندى.
ايتا كەتەلىك، باشقۇرتستاندا ۇستىمىزدەگى جىلدىڭ جەلتوقسانىندا وتەتىن IV حالىقارالىق «كۇمىس اقبوزات» كينوفەستيۆالىنىڭ اشىلۋ سالتاناتى «ورالمان» فيلمىمەن اشىلادى.