روزا رىمبايەۆا: ءبىزدىڭ كەيىنگى ارتىستەردىڭ ءومىرى تەك قانا توي-دۋمان بولىپ كەتتى

استانا. قازاقپارات - روزا رىمبايەۆا بيىل مەنشىكتى مەرەكەسىن ءوزىنىڭ تۋعان جەرى شىعىس قازاقستان وبلىسى، جارما اۋدانىندا اتاپ وتكەن بولاتىن.

تىلشىگە ەكسكليۋزيۆتى سۇحبات بەرگەن حالىق ءارتىسى، جەرلەستەرىنىڭ ورتاسىندا ەرەكشە اسەرگە بولەنىپ قايتقانىن ايتادى.

تۋعان جەرىندە قاراپايىم قاراشانى انمەن سۋسىنداتسا، روزا قۋانىش قىزىنا دەگەن جەرگىلىكتى اتمىنەرلەردىڭ دە قۇرمەتى ەرەكشە. ءارى توسىن سىيلارى دا تاۋسىلماق ەمەس...

«اۋىلىم ماعان جارما اۋدانىنىڭ «قۇرمەتتى ازاماتى» دەگەن قۇرمەتتى اتاق بەردى. حالىقتىڭ قۇرمەتىنەن ارتىق قانداي قۇرمەت كەرەك. سول تۋعان كۇنىمدى اۋىلدا تويلادىم. انىعىن ايتقاندا ساحنادا وتكىزدىم»، - دەيدى روزا رىمبايەۆا.

حالىق ءارتىسى بۇل قادامىم كەيىنگى ۇرپاققا ۇلگى بولسا دەگەن نيەتتە. ويتكەنى، ساۋىق- كەشتىڭ كوركى بولعان قازىرگى ەسترادا وكىلدەرىنە روزا قۋانىش قىزىنىڭ ازدى- كەم وكپە- رەنىشى بار كورىنەدى.

«جالپى مەن توي جاساپ، بانكەت جاساپ، ۇلكەن ءبىر رەستوراندا بالقىپ- شالقىپ، ونى ءبىر تەلەديداردان كورسەتكەندى جەك كورەمىن. وكىنىشكە وراي ءبىزدىڭ كەيىنگى ارتىستەردىڭ ءومىرى تەك قانا سول توي- دۋمان بولىپ كەتتى. مەن سولارعا ادەيى ۇلگى بولسىن دەگەن ماقساتپەن، تۋعان اۋىلىما بارىپ قايىرىمدىلىق كونسەرتىمدى بەردىم»، - دەيدى حالىق ءارتىسى.

تۋعان كۇنىن حالىقپەن بىرگە تويلاۋ تۋرالى يدەيا روزا حانىمنىڭ جادىنان وشكەن ەمەس. ويتكەنى، رىمبايەۆا ءۇشىن تىڭدارماننىڭ ىقىلاسىنان ارتىق قوشەمەت جوق. سوندىقتان بولار، شاقىرعان جەردەن باس تارتا المايدى.

«شاقىرعان جەردەن قالما دەيدى عوي. اۋىلىم شاقىرعان سايىن بارامىن. سەمەي وبلىسىندا قانشاما اۋدان بار. بىلتىر اياكوز اۋدانىندا بولدىم. ودان كەيىن ءوزىمنىڭ كۇيەۋىمنىڭ اۋىلىندا بولدىم ءۇشارالدا. اۋداندار شاقىرعاندا قۋانا- قۋانا بارامىن. سەبەبى ءبىز وتە سيرەك بارامىز شالعايدا جاتقان اۋىلدارعا. اۋىلدىڭ قازىرگى جاعدايىن جاقسى بىلەسىزدەر. سوندىقتان، قاراپايىم كورەرمەن، قاراپايىم مەنىڭ جەرلەستەرىمنىڭ الدىندا ءان شاشۋمەنەن وتكىزدىم بيىلعى تۋعان كۇنىمدى»، -  دەيدى رىمبايەۆا.

الپىستى القىمداعان روزا رىمبايەۆانىڭ ساحنادا جۇرگەنىنە بيىل 42 جىل تولىپ وتىر. باقىتتى ءانشى، اياۋلى انا! الايدا، حالىقتىڭ ەرەكشە سۇيىسپەنشىلىگىنە بولەنگەن تۇلعانىڭ الداعى ارمانىن سۇراپ كورگەن ەدىك.

«ەندىگى ارمانىم ەكى بالامنىڭ باقىتتى بولعانىن كورۋ. انشىلىك ءومىرىمدى باقىتتى وتكىزدىم دەپ ايتا الامىن. 42 جىل ساحنادا ءجۇرمىن، وسى ۋاقىت ىشىندە مەنىڭ تىڭدارمانىم بار، كورەرمەنىم بار. سوندىقتان مەن ءوزىمدى باقىتتى ءانشىمىن دەپ ويلايمىن. ەندىگى بار ارمانىم بالالارىمنىڭ جىگىت بولعانىن، ازامات بولعانىن كورۋ»، - دەيدى روزا قۋانىش قىزى.