پوليتسەيلەردىڭ جىلدامدىق ولشەيتىن قۇرالدارى تەكسەرىلىپ تۇرادى - مينيسترلىك
بۇل تۋرالى «قازاقپارات» اگەنتتىگىنىڭ جولداعان ساۋالىنا وراي ق ر ىشكى ىستەر مينيسترلىگىنىڭ جاۋابىندا ايتىلدى، دەپ حابارلايدى قازاقپارات.
«جىل سايىن ەلىمىزدە بەينەكامەرالاردىڭ كومەگىمەن شامامەن 1 ميلليوننان استام جولدا ءجۇرۋ ەرەجەسىن بۇزۋ فاكتىلەرى انىقتالادى. قازىرگى ۋاقىتتا رەسپۋبليكا جولدارىندا جول ءجۇرىسى قاعيدالارىن بۇزۋشىلاردى تىركەيتىن 2 مىڭعا جۋىق ءارتۇرلى كامەرالار ورناتىلعان»، - دەپ اتاپ وتىلگەن مينيسترلىك مالىمەتىندە.
اتالعان كامەرالار جولدا ءجۇرۋ ەرەجەسىن بۇزۋشىلاردى، ونىڭ ىشىندە توقتاۋ بەلگىسى سىزىقتارىن كەسىپ ءوتۋ، باعدارشامنىڭ تىيىم سالاتىن بەلگىسىنە ءجۇرىپ كەتۋ، قارسى جولاققا شىعۋ جانە جىلدامدىق رەجىمىن اسىرۋ سياقتى تۇرلەرىن انىقتايدى.
بۇدان بولەك، مينيسترلىك جىلدامدىقتى ولشەيتىن قول قۇرالدارى مىندەتتى تۇردە تەكسەرىستەن وتەتىنىن حابارلادى.
«جول- پاترۋلدىك پوليتسيا قىزمەتكەرلەرى كولىك قۇرالدارىنىڭ جىلدامدىعىن ولشەۋ ءۇشىن قولداناتىن قۇرىلعىلار مىندەتتى تۇردە مەترولوگيالىق تەكسەرىستەن وتكىزىلىپ، ىشكى ىستەر ورگاندارىندا ينۆەنتارلىق تىركەۋگە الىنادى»، - دەيدى ۆەدومستۆو وكىلدەرى.