استانالىقتاردى كۇل-تالقانى شىققان كولىكتەر لەگى شوشىتتى - فوتو، كەسكىن

استانا. قازاقپارات - ەلوردا تۇرعىندارى جول اپاتىنا ۇشىراعان كولىكتەردى جۇرتشىلىققا كورسەتكەن پوليتسەيلەردىڭ اكسياسىنا شوشىنا قارادى، دەپ حابارلايدى قازاقپارات.  

تاڭەرتەڭ اگەنتتىك رەداكسياسىنا بۇل جاعدايدى كورگەن ادامدار حابارلاسىپ، اپاتقا ۇشىراعان كولىكتەردى ارتىپ العان بىرنەشە ەۆاكۋاتورلار جايىندا ايتىپ بەردى. قالا تۇرعىدارى بۇل ءىرى جول- كولىك اپاتى بۇگىن قالا اۋماعىندا ورىن الدى دەپ ويلاعان.

ءوز كەزەگىندە استانا قالاسى ءىىد باسپا ءسوز قىزمەتى بۇل شارا «قاۋىپسىز جول ءجۇرىسى» اپتالىعى رەسپۋبليكالىق ناۋقانى اياسىندا ۇيىمداستىرىلعانىن مالىمدەدى. بۇگىنگى اكسيانى جول- كولىك اپاتىنان قۇربان بولعانداردى ەسكە الۋ ماقساتىندا جەرگىلىكتى پوليتسيا قىزمەتى مەن اكىمشىلىك پوليتسيا باسقارماسى وتكىزدى. پوليتسەيلەر جول اپاتىنا ۇشىراعان بىرنەشە كولىكتى ەۆاكۋاتورلارعا تيەپ، قالا كوشەلەرىمەن ءجۇرىپ ءوتتى.

 وسىنداي شارا ارقىلى پوليتسەيلەر قوعامنىڭ نازارىن جول اپاتتارىنىڭ سالدارىنا اۋدارعىسى كەلگەن. ولاردىڭ پايىمىنشا، جول جۇرىسىنە قاتىسۋشىلار ءوزارا ءىس- قيمىل جاساۋعا، جول قاۋىپسىزدىگىن ساقتاۋ مەن جۇرگىزۋشى مادەنيەتىن ارتتىرۋعا ەرەكشە ءمان بەرۋى ءتيىس.

 

اكسيا استانانىڭ نەگىزگى كوشەلەرىندە وتۋدە. جكو سالدارىنان قيراعان كولىكتەردىڭ كەرۋەنى جاستار سارايىنان باستالدى. كەيىن ەۆاكۋتورلار شەرۋى رەسپۋبليكا داڭعىلى، تاشەنوۆ، تاۋەلسىزدىك، ب. مومىش ۇلى، م3 كوپىرى، ماڭگىلىك ەل، دوستىق، قابانباي باتىر، قونايەۆ، تۇران، سارى ارقا، بوگەنباي داڭعىلدارىمەن جالعاستى.