قاراعاندىنىڭ ەڭ ادەمى ارۋى انىقتالدى
قازىلار القاسى 20 قاتىسۋشىنىڭ اراسىنان اقىلى مەن كوركى كەلىسكەن ارۋ رەتىندە 19 جاستاعى قاراعاندىلىق ەكاتەرينا دۆورەتسكايانى تانىدى.
بايقاۋ ۇيىمداستىرۋشىسى - «Art linە» مودەلدىك اگەنتتىگى.
قاتىسۋشىلار الەۋمەتتىك جەلى ارقىلى ىزدەستىرىلدى. ينستاگرامدا #حوچۋستاتميسسكاراگاندا2017 حەشتەگىمەن بايقاۋ جاريالاندى. قىزدار كيىم ۇلگىلەرىن كورسەتىپ، فوتوكامەرا الدىندا جۇمىس ىستەي ءبىلۋ قابىلەتتەرىن، بىلىمدەرىن پاش ەتتى.
فينالدا باق تالاستىرعان ارۋلار كەشكى كويلەكتەرمەن، قىمبات ىشىكتەرمەن ساحناعا شىعىپ، حورەوگرافيالىق تالانتتارىن كورسەتتى.
ءادىل قازىلار القاسىنىڭ قۇرامىندا 2004 -جىلعى جازعى وليمپيادا ويىندارىنىڭ قولا جۇلدەگەرى دميتري كارپوۆ، «X Factor» مۋزىكالىق جوباسىنىڭ جەڭىمپازى ابدۋلكارىم كاريموۆ، «قازاقستان ارۋى» بايقاۋىنىڭ پرەزيدەنتى الەنا ريۆلينا- قىرباسوۆا، فوتوگراف الەكسەي بارانوۆ، «قازاقستان ارۋى 2015» جەڭىمپازى رەناتا نۇرعازينا بولدى.
قازىلار القاسىنىڭ ءتوراعاسى الماتى قالاسى جاستار ساياساتىن دامىتۋ مەملەكەتتىك قورىنىڭ ديرەكتورى سوۆەت سەيىتوۆ بولدى.
ءسان بايقاۋىنىڭ ناتيجەسىندە نادەجدا حولوستياكوۆا «كورەرمەن كوزايىمى» اتالىمىندا جەڭىمپاز بولدى. ءۇشىنشى ۆيتسە-ميسس - ديانا رۋستامبەكوۆا، ەكىنشى ۆيتسە-ميسس - كريستينا گۋسيەۆا، ءبىرىنشى ۆيتسە-ميسس - ماحاببات تۇكتىبايەۆا.
جەڭىمپاز اتانعان ەكاتەرينا دۆورەتسكايا بايقاۋ ءتاجى مەن 500 مىڭ تەڭگە اقشالاي سىيلىققا يە بولدى.