گران-پري: ەليزابەت تۇرسىنبايەۆا ۇزدىك بەستىكتە

استانا. قازاقپارات - فرانسيانىڭ گرەنوبل قالاسىندا مانەرلەپ سىرعاناۋدان ءوتىپ جاتقان گران- پريدىڭ بەسىنشى كەزەڭىندە ايەلدەر اراسىندا جۇلدەگەرلەر بەلگىلى بولدى، دەپ حابارلايدى «قازاقپارات» ءتىلشىسى.

رەسەيلىكتەر الينا زاگيتوۆا (213,80 بالل) مەن ماريا سوتسكوۆا (208,78) العاشقى ەكى ورىندى يەلەنسە، كانادالىق كەيتلين وسموند (206,77) ۇزدىك ۇشتىكتى تۇيىندەدى. بۇلاردىڭ ۇشەۋى دە گران- پري فينالىندا ونەر كورسەتۋ مۇمكىندىگىنە يە بولدى.

قىسقا جانە ەركىن باعدارلامادان كەيىن 200,98 بالل جيناعان قازاقستاندىق ەليزابەت تۇرسىنبايەۆا جۇلدەلى ورىنعا قول سوزىم عانا جەتپەي، بەسىنشى ورىنعا تابان تىرەدى. بۇل دا جوعارى ناتيجە دەۋگە بولادى.

ايتا كەتەيىك، مۇنىڭ الدىندا مينسكىدە وتكەن چەللەندجەر تۋرنيرىندە ەليزابەت توپ جارىپ، التىن جۇلدەنى يەلەنگەن بولاتىن. ە. تۇرسىنبايەۆا ءۇشىن باستى ماقسات الداعى جىلى وڭتۇستىك كورەيانىڭ پحەنچحان قالاسىندا وتەتىن قىسقى وليمپيادا ويىندارىندا ءساتتى ونەر كورسەتۋ ەكەندىگى بەلگىلى.