قازاقستاندا وليمپيادا ويىندارىن وتكىزۋگە مۇمكىندىك پەن تاجىريبە بار - كورەيا ەلشىسى
«ءبىزدىڭ ويىمىزشا، قازاقستان سپورتتىق دەرجاۆا بولىپ تابىلادى. قازاقستاندا قىسقى سپورت تۇرلەرى وتە تانىمال ەكەنى بەلگىلى. سوندىقتان دا پحەنچحانداعى وليپيادا ويىندارى جايىندا ەگجەي- تەگجەيلى اقپارات بەرۋگە تىرىسۋدامىز»، - دەدى ەلشى تىلشىلەرمەن كەزدەسۋ بارىسىندا.
ەسكە سالا كەتەيىك، XXIII قىسقى وليمپيادا ويىندارى الاۋى 2018 -جىلى 9 -اقپان كۇنى پحەنچحان قالاسىندا تۇتانادى. الەم دوداسى 25 -اقپانعا دەيىن جالعاسادى. سونىمەن قاتار 9-18 -ناۋرىز ارالىعىندا پاراليمپيادالىق ويىندار وتەدى.
ۇيىمداستىرۋشىلار ايتۋلى شارانىڭ اشىلۋ سالتاناتى تاڭعالارلىق دەڭگەيدە بولاتىنىن مالىمدەدى. ياعني اشىلۋ ءراسىمى 9 اقپاندا جەرگىلىكتى ۋاقىت بويىنشا ساعات 19:00 كەزىندە 35 مىڭ كورەرمەنگە ارنالعان پحەنچحانداعى باس ستاديوندا وتەدى. جالپى سپورتتىق شارا اياسىندا 12 نىسان جۇمىلدىرىلماق.
«كورەيا اقپاراتتىق تەحنولوگيالار سالاسىندا وتە جاقسى دامىعان. وليمپيادا ويىندارىن وتكىزۋ كەزىندە سوڭعى بۋىندى تەحنولوگيالاردى ەنگىزۋگە نيەتتىمىز، ونىڭ ىشىندە 5G جەلىسى دە بار. جەلتوقساننىڭ ورتا كەزىندە ينچحون اۋەجايى مەن پحەنچحان قالاسى اراسىندا جوعارى جىلدامدىقتى پويىزدى ىسكە قوسپاقپىز»، - دەدى ەلشى.
كيم دەسيكتىڭ اتاپ وتۋىنشە، وليمپيادا مەن پاراليمپيادا ويىندارى قوناقتارىن قارسى الۋعا 20 مىڭ ەرىكتى جۇمىلدىرىلماق. ەرىكتى اتانۋ ءۇشىن 145 ەلدەن 90 مىڭنان استام ادام ءوزارا تالاسقا تۇسكەن ەكەن.
قازاقستان مەن كورەيا اراسىندا 30 كۇنگە ۆيزاسىز رەجىم بولسا دا، ديپلومات وليمپيادا ويىندارىنا بارۋعا نيەتتى قازاقستاندىقتارعا بارىنشا كومەك كورسەتۋگە ۋادە ەتتى. وسى ورايدا كورەيا جاعى ويىنداردى وتكىزۋ كەزەڭىندە استانا مەن الماتىدان تىكەلەي اۋە رەيستەرىنىڭ جيىلىگىن ارتتىرۋعا دايىن.
سونىمەن قاتار ەلشى مىرزا بولاشاقتا قازاقستان دا وليمپيادا ويىندارىن وتكىزەتىنىنە ءۇمىت ارتتى.
«مەنىڭ ويىمشا، بولاشاقتا قازاقستاننىڭ وليمپيادا ويىندارىن وتكىزۋ مۇمكىندىگى جوعارى. سىزدەردە ول ءۇشىن بارلىق مۇمكىندىك مەن تاجىريبە بار. وسى ەلدە ازيا ويىندارى مەن ۋنيۆەرسيادا ءوتتى. «الاۋ» سپورت سارايىنداعى مۇزدىڭ ساپاسى جوعارى ەكەنىن بايقاپ ءجۇرمىز. وسى ورايدا بۇنداي ساپا وزگە دە سپورتتىق نىسانداردا قاراستىرىلعانىن بىلەمىن. جالپى، سپورتتىق باعىتتا قازاقستان كورەياعا قاراعاندا الدا كەلە جاتىر دەپ ويلايمىن»، - دەپ تۇيىندەدى ءسوزىن ول.