بىشكەك: قازاقستانمەن شەكارادا كەزەك قايتا كوبەيدى
شەكارا قىزمەتى باسقا بەكەتتەردە كەزەك بايقالمايتىنىن ايتادى.
وتكەن اپتانىڭ باسىندا شەكارادا كەزەك كۇرت ازايعان. شەكارا قىزمەتىنىڭ ەسەبىنشە، 8- قاراشادا «اق-تىلەك» بەكەتىندە ونداعان جۇك كولىگى تۇرعان. ۆەدومستۆو قازاقستاندىق شەكاراشىلار ول كەزدە بوس كولىكتەردى كەدەرگىسىز وتكىزگەنىن، ال جاڭادان كولىك بارماعانىن ايتقان. ال سوڭعى كۇندەرى كەزەك قايتا كوبەيە باستاعان.
بۇگىن شەكارادان ساعاتىنا ورتا ەسەپپەن جەتى-سەگىز جۇك كولىگى عانا وتكىزىلىپ جاتىر.
7- قازاندا قىرعىزستان پرەزيدەنتى المازبەك اتامبايەۆ پرەزيدەنتتىككە كەيبىر كانديداتتار مەن قازاقستان بيلىگىنىڭ اتىنا قاتار سىن ايتقان. وسىدان كوپ ۇزاماي، 10- قازاندا قازاقستان قىرعىزستانمەن شەكارادا تەكسەرۋدى كۇشەيتىپ، شەكارانىڭ قىرعىز جاعىندا جۇك كولىكتەرىنىڭ كەزەگى پايدا بولعان.
تاراپتار 19- قازاننان باستاپ جولاۋشىلار كولىگى مەن جۇگى بار جولاۋشىلاردى وتكىزۋدى جەڭىلدەتۋگە كەلىسكەن بولاتىن.
استانا شەكاراداعى تەكسەرۋدى قىرعىزستاننان كەلەتىن «كونتراباندامەن كۇرەسۋ ءۇشىن» كۇشەيتكەنىن ايتادى. بىشكەك قازاقستان شەكارادا «قولدان كەدەرگى جاساپ وتىرعانىن» ايتىپ، دۇنيەجۇزىلىك ساۋدا ۇيىمىنا جانە ەۋرازيا ەكونوميكالىق وداعىنا (ە ا ە و) جۇگىنگەن.
وسى اپتادا المازبەك اتامبايەۆ قازاقستان باسشىلىعىنىڭ اتىنا تاعى دا سىن ايتىپ، قىرعىزستان قازاقستان بيلىگىنىڭ «ءوزىم بىلەمدىگى» سالدارىنان ءبىر ايدان استام ۋاقىت ە ا ە و- مەن بايلانىسىن ۇزگەنىن مالىمدەگەن.
«ازاتتىق»