يۋنيسەف- تىڭ قازاقستانداعى «ۇلتتىق ىزگى نيەت ەلشىسى» تاعايىندالدى
يۋنيسەف بۇل اتاقتى 1954 -جىلدان بەرى تاعايىنداپ كەلەدى. وسىلايشا، ۇلتتىق ىزگى نيەت ەلشىسى بولعان تانىمال مادەنيەت، سپورت، ادەبيەت قايراتكەرلەرى ءوز ەلدەرىندە بالالاردىڭ قۇقىقتارىن قورعاۋعا كۇش سالادى.
ۇلتتىق ىزگى نيەت ەلشىسى ەتىپ تاعايىنداۋ ارقىلى بالالاردىڭ ماسەلەلەرىنە بەلگىلى ادامداردىڭ نازارىن اۋدارۋ كوزدەلەدى. ماسەلەن، اتالعان قۇرمەتتى اتاق ارگەنتينادا ليونەل مەسسيگە، ال ۇلى بريتانيادا دەۆيد بەكحەمگە بۇيىرعان. قازاقستانداعى يۋنيسەف وكىلى يۋريي وكساميتنىيدىڭ ايتۋىنشا، بۇل اتاقتى جەڭىپ الۋ ءۇشىن تانىمال بولۋ جەتكىلىكسىز.
«يۋنيسەف- ءتىڭ ىزگى نيەت ەلشىلەرى بالالاردىڭ قۇقىقتارىن ىلگەرىلەتۋگە، يۋنيسەف- ءتىڭ باستى قۇندىلىقتارىنا جانە ميسسياسىنا رياسىز ادالدىعىن كورسەتەدى. ءبىز ۇمىتكەردى كوپ ىزدەدىك. دينارا - ءدال وسىنداي ادام. ءبىز كوزقاراستارىمىز جانە ماقسات- نيەتتەرىمىز تولىعىمەن ءبىر جەردەن شىققانىنا قۋانىشتىمىز»، - دەيدى يۋريي وكساميتنىي.
دينارا ءسادۋاقاسوۆا ءوز سوزىندە ۇلتتىق ىزگى نيەت ەلشىسى بولىپ تاعايىندالۋدىڭ بار جاۋاپكەرشىلىگىن تۇسىنەتىنىن اتاپ ءوتتى.
«يۋنيسەف- ءتىڭ ماعان سەنىم ارتقانىنا ريزامىن جانە وسى سەنىم ۇدەسىنەن شىعۋ ءۇشىن قولىمنان كەلگەننىڭ بارلىعىن جاسايتىنىما سەنىدىرگىم كەلەدى. بالالار قامقورلىق پەن مەيىرىمگە بولەنىپ، ءوز پىكىرىن ەرەسەكتەرگە جەتكىزە الۋى ءۇشىن بارلىعىمىز بىرىگىپ، ناتيجە شىعارۋدى قالايمىن»، - دەيدى شاحماتشى بويجەتكەن.
بيىل يۋنيسەف ۇيىمىمەن دينارا بىرلەسە شارالاردى وتكىزىپ، ماڭعىستاۋ وبلىسىنا ساپار شەگىپ كەلگەن. ناقتىراق ايتقاندا، ول كامەلەتكە تولماعانداردى بەيىمدەۋ ورتالىعىنا، ديەۆيانتتى مىنەز- قۇلىقتى بالالارعا ارنالعان مەكتەپ- ينتەرناتقا، وتباسىلىق ءتيپتى بالالار اۋىلىنا بارىپ، ولاردىڭ ومىرىنە قاتىستى وزەكتى ماسەلەلەرىن ءبىلىپ قايتقان.
فوتو: instagram/@dinara.saduakassova