ب ۇ ۇ قاۋىپسىزدىك كەڭەسى: ا ق ش دايىنداعان جوباعا رەسەي ۆەتو جاريالادى

استانا. قازاقپارات - بىرىككەن ۇلتتار ۇيىمىنىڭ قاۋىپسىزدىك كەڭەسىندە «سيريادا حيميالىق قارۋدىڭ قولدانىلۋىن زەرتتەۋ» ماسەلەسى توڭىرەگىندە تالاس تۋىندادى.

 تەكسەرۋدى ودان ءارى جالعاستىرۋ تۋرالى ا ق ش دايىنداعان جوباعا رەسەي ۆەتو جاريالادى. قۇجاتتى 12 مەملەكەت قولداعان. ال قىتاي مەن ەگيپەت داۋىس بەرۋدەن باس تارتتى. ىلە- شالا رەسەي بۇل ىسكە قاتىستى ءوز ماماندارى دايىنداعان جوبانى ۇسىنعان. الايدا ا ق ش باستاعان بىرنەشە مەملەكەت بۇل قارارعا قارسى شىعىپ، قابىلداماي تاستادى.

 ۆاسيلي نەبەنزيا، رەسەيدىڭ ب ۇ ۇ جانىنداعى تۇراقتى وكىلى:

 - امەريكالىقتار ۇسىنعان قارار جوباسىندا تەپە- تەڭدىك ساقتالماعان. ساراپشىلار تالقىلاپ، قايتا قاراعانىمەن، ءماتىننىڭ نۇسقاسىنا ەشقانداي تۇزەتۋ ەنگىزىلمەدى. بۇعان دەيىنگى زەرتتەۋ توبى كورسەتكەن كەمشىلىكتەرى سول قالپىندا قالعان. ەندى بىرلەسكەن مەحانيزمنىڭ جۇمىسى توقتاسا، جاۋاپكەرشىلىك وسى جوبانى دايىنداپ، ونى قولداعانداردىڭ موينىندا بولادى.

 العاش رەت بۇل قارار 2015 -جىلى قاۋىپسىزدىك كەڭەسىنە مۇشە 15 مەملەكەتتىڭ ءبىراۋىزدان داۋىس بەرۋى نەگىزىندە قابىلدانعان بولاتىن. 2016 -جىلى ول تاعى ءبىر جىلعا ۇزارتىلدى. ەگەر وسى جولى قايتا قابىلدانباسا، بۇگىننەن باستاپ سيرياداعى حيميالىق قارۋدىڭ قولدانىلۋىن بىرلەسىپ زەرتتەيتىن توپ جۇمىسىن توقتاتادى.

بىرىككەن ۇلتتار ۇيىمىنىڭ جانىنان جاساقتالعان ساراپشىلار توبى سوڭعى رەت سيريانىڭ حان- شەيحۋن قالاسىندا ۇكىمەت اسكەرى حيميالىق قارۋ قولداندى دەگەن قورىتىندى جاساعان بولاتىن. الايدا رەسەي تارابى قورىتىندىنىڭ اقىلعا سىيمايتىنىن مالىمدەدى.

www.24.kz