ورالدا ءداستۇرلى ماحامبەت وقۋلارى مارەگە جەتتى
ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنا سايكەس ۋنيۆەرسيتەتتىڭ 85 جىلدىعىنا ارنالعان رەسپۋبليكالىق عىلىمي- تاجىريبەلىك كونفەرەنسياسى باستالماستان بۇرىن ماحامبەت ءمۇسىنى اشىلدى. ونىڭ اۆتورى - قازاقستان سۋرەتشىلەر وداعىنىڭ مۇشەسى يبراگيم ايدەنوۆ. وعان قازاقستان سۋرەتشىلەر وداعىنىڭ مۇشەسى احمەت ەرعاليەۆ كومەكتەسكەن. ي. ايدەنوۆ ءمۇسىن سالۋدا بەلگىلى انتروپولوگ نوەل شاياحمەتوۆتىڭ زەرتتەۋلەرىنە سۇيەنگەن.
«ءبىزدىڭ ۋنيۆەرسيتەت ءۇشىن ماحامبەت باتىر ءارى اقىننىڭ ورنى ەرەكشە. ۇجىم ونى ءاردايىم قۇرمەت تۇتىپ، ولەڭدەرىن وقيدى، ەرلىگىن ناسيحاتتايدى. بۇگىنگى شارا - سونىڭ ءبىر كورىنىسى. ازىرگە قالامىزدا ازاتتىق ءۇشىن الىسقان ماحامبەتتىڭ ەڭسەلى ەسكەرتكىشى تۇرعىزىلماسا دا، بۇگىن ءمۇسىنىن اشتىق. ۋنيۆەرسيتەتتە تايمانوۆ، يۆانوۆ وقۋلارى دا ءداستۇرلى تۇردە ءوتىپ تۇرادى. ماحامبەت وقۋلارى «رۋحاني جاڭعىرۋ» باعدارلاماسى اياسىندا اقىن مۇراسىنا قايتا ورالتىپ، ونى زەرتتەۋدىڭ، جاس ۇرپاق ساناسىنا جەتكىزۋدىڭ ماڭىزدىلىعىن ارتتىرا تۇسەدى»، - دەدى ۋنيۆەرسيتەت رەكتورى، پەداگوگيكا عىلىمدارىنىڭ دوكتورى، اكادەميك اسحات يمانعاليەۆ.
كونفەرەنسياعا قازاقستان مەن رەسەيدەگى ج و و- لاردان، سونداي- اق ەلىمىزدەگى كوللەدج، مەكتەپتەردەن بارلىعى 120 بايانداما ءتۇستى. باياندامالار تاقىرىبى كەڭ كولەمدى. اتاپ ايتقاندا، ولاردا ماحامبەتتانۋدىڭ بۇگىنگى تاڭداعى وزەكتى ماسەلەلەرى، اقىن عۇمىرىمەن جانە ونىڭ ادەبي مۇراسىمەن بايلانىستى تاريحي تىڭ دەرەكتەر، ماحامبەت شىعارمالارىنىڭ جوعارى وقۋ ورىندارىندا جانە جالپى ورتا ءبىلىم بەرەتىن مەكتەپتە وقىتىلۋ جايى قاراستىرىلعان. سونداي- اق قازاق ءتىلى مەن ادەبيەتىنىڭ تەوريالىق جانە ادىستەمەلىك ماسەلەلەرى، گۋمانيتارلىق، تاريح، قوعامدىق- الەۋمەتتىك، ەكونوميكا، ونەرتانۋ جانە باسقا عىلىم سالالارىنىڭ بۇگىنگى تاڭداعى باعىت- باعدارى، دامۋ جايى تەكسەرىس كوزىنە الىندى.
كونفەرەنسياعا استانا، اقتوبە، اتىراۋ، ورال قالالارىنان جانە وبلىس اۋداندارىنان عالىمدار مەن زەرتتەۋشىلەر، ۇستازدار قاتىسىپ، ءوز وي- تولعامدارىمەن ءبولىستى. جيىن قورىتىندىسىنا سايكەس ارنايى جيناق شىعارىلاتىن بولادى.
ايتا كەتەيىك، ورالدا يساتاي مەن ماحامبەت ەسكەرتكىشىن ورناتۋ ماسەلەسى كوپتەن بەرى ءسوز بولىپ كەلەدى.
اۆتور: ەلجان ەرالى