اسكەري توڭكەرىس: پرەزيدەنت مۋگابە قاماۋعا الىندى - كەسكىن

None
None
استانا. قازاقپارات - سەيسەنبىدەن سارسەنبىگە قاراعان ءتۇنى زيمبابۆە اسكەريلەرى زەد-بي-سي مەملەكەتتىك تەلەكومپانياسىنىڭ عيماراتىن باسىپ الىپ، ەل باسشىسى روبەرت مۋگابە مەن ونىڭ وتباسىن قاماۋعا العانىن مالىمدەدى.

گەنەرال مايور س. ب. مويو تەلەارناداعى مالىمدەمەسىندە بولعان وقيعانىڭ اسكەري توڭكەرىس ەمەس ەكەنىن جانە مۋگابە مەن ونىڭ تۋىستارىنا ەشقانداي قاۋىپ جوق ەكەنىن ايتتى.

ەلدەگى بيلىك پارتياسى زانۋ-پف (زيمبابۆە افريكالىق ۇلتتىق وداعى -  پاتريوتتىق فرونت) ەل باسشىسىنىڭ قاماۋعا الىنعانىن راستادى، دەپ حابارلادى ۇلى بريتانيالىق The Sun پورتالى.



زانۋ-پف ارنايى مالىمدەمە جاساپ، بۇل قادامنىڭ «ۇلتتىڭ ساۋلىعى ءۇشىن» جاسالعانىن ايتتى.

«زيمبابۆە دە، پارتيا دا مۋگابەگە دە، ونىڭ ايەلىنە دە تيەسىلى ەمەس. بۇگىن جاڭا ءداۋىر باستالدى»- دەلىنگەن پارتيا مالىمدەمەسىندە.

BBC جەرگىلىكتى ب ا ق- قا سۇيەنە وتىرىپ، مۋگابە قىزمەتىنەن باس تارتۋعا دايىندالىپ جاتقانىن، ال ونىڭ ءىزباسارى ونىڭ ايەلى ەمەس، ۆيتسە-پرەزيدەنت ەممەرسون منانگاگۆا بولاتىنىن جازادى.

پارتيا مالىمدەمەسىندە «جولداس منانگاگۆا زيمبابۆەنى جاقسىراق ەتۋگە كومەكتەسەدى» دەلىنگەن.

گەنەرال مويونىڭ مالىمدەمەسىنە دەيىن بىرنەشە ساعات بۇرىن قالا كوشەلەرىندە ساربازدار مەن اسكەري تەحنيكا كوبەيگەن.

СNN  بۇل وقيعانى مۋگابەنىڭ ءبىر اپتا بۇرىن ۆيتسە-پرەزيدەنت ەممەرسون منانگاگۆانى جۇمىستان بوساتۋىنا جاۋاپ رەتىندە باعالاپ وتىر. СNN  گرەيس مۋگابەنىڭ ەلدەگى ابىرويى جوعارى ەمەس ەكەنىن جازادى. جەرگىلىكتى حالىق ونىڭ قىمبات دۇكەندەرگە ءجيى بارعانى ءۇشىن «گۋچچي گرەيس» دەپ اتاپ كەتكەن.




حالىقتىڭ جاعدايى ناشار كەزدە پرەزيدەنت جارىنىڭ قىمبات دۇنيەلەرگە قىزىعۋى ونىڭ بەدەلىن تۇسىرسە كەرەك. ال منانگاگۆا بولسا، اسكەر مەن قاۋىپسىزدىككە جاۋاپتى ورگانداردىڭ قولداۋىنا يە. 75 جاستاعى ساياسي قايراتكەر قىزمەتتەن كەتكەن سوڭ كوزدەن تاسا بولعان، قازىر ونىڭ قايدا ەكەنى بەلگىسىز.

Egemen.kz

سوڭعى جاڭالىقتار