شىعىس قازاقستاندا ءتورت اۋىل جويىلادى

استانا. قازاقپارات - شىعىس قازاقستان وبلىسىنىڭ كوكپەكتى اۋدانىندا ءتورت اۋىل زاڭدى تۇردە جويىلادى.

اتاپ ايتقاندا، ورنەك، كامەنكا، قىزىل جۇلدىز جانە قارعالى اۋىلدارى. سەبەبى اتالعان اۋىلدارداعى تۇرعىندار سانى 50 دەن از، دەپ حابارلايدى قازاقپارات altaynews.kz پورتالىنا سىلتەمە جاساپ.

«بۇل اۋىلدىڭ تۇرعىندارى ەشقايدا دا كوشىرىلمەيدى. قىستا ول جاقتارعا جول اشۋ جۇمىستارى جۇرگىزىلەدى. يەلىكتەگى جەرلەر ءوز قوجايىندارىندا قالادى. ءتورت اۋىل زاڭدى تۇردە جابىلعانىمەن، اۋدانداعى نەگىزگى ەلدى مەكەندەر قۇرامىنا ەنەتىن بولادى»، - دەدى اۋدان اكىمى راميل ساعاندىقوۆ.

ايتا كەتۋ كەرەك، قار قالىڭ تۇسەتىن كوكپەكتى اۋدانىندا وسى قىستا قاردان ارشۋ جۇمىستارىمەن «دسۋ-14» جانە «كوپەكتى جولدارى» اتتى ەكى كومپانيا اينالىساتىن بولادى.

بۇل تۇرعىدا وسى جىلدىڭ سوڭىنا دەيىن جەرگىلىكتى بيۋجەتتەن 20 ميلليون تەڭگە قاراجات قاراستىرىلعان. كەلەسى جىلى بۇل ماقساتقا 90 ميلليون تەڭگە جوسپارلانىپ وتىر.