نۇرسۇلتان نازاربايەۆ ق ر پرەمەر- ءمينيسترىن قابىلدادى

 استانا. قازاقپارات - نۇرسۇلتان نازاربايەۆ پرەمەر- مينيستر باقىتجان ساعىنتايەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

 مەملەكەت باسشىسى كەزدەسۋ بارىسىندا ۇكىمەتتىڭ جىل باسىنان بەرى اتقارىپ جاتقان جۇمىستارىنىڭ ناتيجەلەرىنە توقتالىپ، ەكونوميكانىڭ ءتۇرلى سەكتورىنداعى مەملەكەتتىك جانە سالالىق باعدارلامالاردى ودان ءارى ساپالى ىسكە اسىرۋدىڭ ماڭىزدىلىعىنا نازار اۋداردى.

 «جىل اياقتالىپ كەلەدى. وسى ۋاقىت ىشىندە كوپ جۇمىس اتقارىلدى. ءبىز ەكسپو كورمەسىن، يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءسامميتىن وتكىزدىك. باسقا دا سالالارداعى جوبالاردى جۇزەگە اسىرىپ جاتىرمىز. جالپى، ەكونوميكامىز تۇراقتى دامىپ كەلەدى» ، - دەدى ەلباسى.

 باقىتجان ساعىنتايەۆ قازاقستان پرەزيدەنتىنە بيىلعى 10 ايداعى الەۋمەتتىك- ەكونوميكالىق دامۋدىڭ قورىتىندىلارى جونىندە بايانداپ، بىرنەشە كورسەتكىشتەر مەن ينديكاتورلار بويىنشا وڭ وزگەرىس بار ەكەنىن اتاپ ءوتتى. «بيىلعى 10 ايدىڭ قورىتىندىسى بويىنشا ىشكى جالپى ءونىم 4 پايىزعا ءوستى. بارلىق 6 سالا بويىنشا قىسقا مەرزىمدى ەكونوميكالىق ينديكاتورلاردىڭ وڭ ءوسىمى بايقالۋدا. سونداي- اق، جىل سوڭىنا دەيىن ەلىمىزدىڭ كولىك- ترانزيتتىك الەۋەتىن ارتتىرۋعا باعىتتالعان جوبالاردى ىسكە اسىرۋ ارقىلى جاقسى ناتيجەگە قول جەتكىزەمىز دەگەن ويدامىز» ، - دەدى پرەمەر- مينيستر.

بۇدان بولەك، باقىتجان ساعىنتايەۆ نۇرسۇلتان نازاربايەۆتى جالپى كاپيتالعا سالىنعان ينۆەستيتسيا كولەمى 6,5 پايىزعا وسكەنى جونىندە حاباردار ەتتى. پرەمەر- مينيستر بۇل ينديكاتور بويىنشا نەگىزگى ءوسىم ەل ەكونوميكاسىنا تارتىلعان جەكە ينۆەستيتسيالار كولەمىنىڭ ارتۋى ەسەبىنەن بولىپ وتىرعانىن ايتتى. سوڭىندا مەملەكەت باسشىسى ءبىرقاتار ناقتى تاپسىرما بەردى.