ياكۋتيادا شەتەلدىكتەردىڭ جۇمىس ىستەۋىنە تىيىم سالىنباق

استانا. قازاقپارات - ياكۋتيادا شەتەلدىكتەردىڭ قۇرىلىس جانە ونەركاسىپ سالالارىندا جۇمىس جاساۋىنا تىيىم سالىنباق، دەپ حابارلايدى ت ا س س.

ياكۋتيا بيلىگى قۇرىلىس جانە پايدالى قازبالار ءوندىرۋ سالالارىنا شەتەلدىك جۇمىس كۇشىن تارتۋعا تىيىم سالۋعا باعىتتالعان جارلىق جوباسىن ازىرلەدى.

بۇل تۋرالى ياكۋتيانىڭ جۇمىسپەن مەملەكەتتىك كوميتەتىنىڭ ءتوراعاسى ستەپان موسكۆيتين مالىمدەدى.

ونىڭ ايتۋىنشا، بيلىكتىڭ مۇنداي شەشىمگە كەلۋىنە رەسپۋبليكاداعى جۇمىسسىزدىقتىڭ جوعارى دەڭگەيى مەن وڭىرلىك ەڭبەك نارىعىنداعى تەپە-تەڭدىكتىڭ بۇزىلۋى سەبەپ بولعان.

«قۇرىلىس جانە ونەركاسىپ سالالارىنان تىس، 2018-جىلى شەكتەۋ قويىلاتىن سالالاردىڭ قاتارىندا كولىك، ءبىلىم بەرۋ جانە دەنساۋلىق ساقتاۋ سالالارى دا بار. جارلىق جوباسى ءوڭىردىڭ ونەركاسىپ كومپانيالارىنا تالقىلاۋ ءۇشىن جىبەرىلدى»، - دەدى ول.

كوميتەت باسشىسىنىڭ سوزىنە قاراعاندا، رەسپۋبليكاداعى حالىقتىڭ %52 ءى تۇرعىن ءۇي-كوممۋنالدىق شارۋاشىلىق، اۋىل شارۋاشىلىعى، بيۋدجەتتىك سالا سەكىلدى قوسىلعان قۇنى تومەن سالالاردا ەڭبەك ەتەدى.

ال جالپى وڭىرلىك ءونىمنىڭ %70 ءىن بەرەتىن ونەركاسىپ، قۇرىلىس جانە كولىك سالالارىندا رەسپۋبليكا تۇرعىندارىنىڭ %30 ءى جۇمىسپەن قامتىلعان.