باقىتجان ساعىنتايەۆ جۇمىس ساپارىمەن الماتىعا باردى
ۇكىمەت باسشىسى مەملەكەتتىك باعدارلامالار مەن ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى مىندەتتەرىنىڭ ىسكە اسىرىلۋىمەن، سونداي- اق، قارجى سەكتورىن دامىتۋ، شوب- قا قولداۋ كورسەتۋ، وندىرىستىك يننوۆاتسيالاردى ەنگىزۋ جانە قالانىڭ كولىك جۇيەسىن جاقسارتۋ شارالارىمەن تانىسادى.
الماتىعا كەلگەن بويدا، كەشكە، 23 - قازاندا پرەمەر- مينيستر ءبىرىنشى كەزەكتە قالا اۋەجايىن كەشەندى جاڭعىرتۋ جوسپارىمەن تانىستى. ايتا كەتۋ كەرەك، اۋە ايلاعى وڭتۇستىك- شىعىس ازيا مەن ەۋروپا اراسىنداعى گەوگرافيالىق قولايلى جەردە ورنالاسقان، ول ءوڭىردىڭ ترانزيتتىك الەۋەتىن ارتتىرۋعا جول اشادى. بۇگىندە الماتى اۋەجايىنان شامامەن 40 اۋە كومپانياسى تاۋلىگىنە 150-دەن استام رەيس جاسايدى.
جوبا اياسىندا ترانزيتتىك ايماقتاردى جانە جولاۋشىلار تەرمينالىنىڭ ۇشۋ زالدارىن كەڭەيتۋ جوسپاردا بار. بۇل جولاۋشىلار مەن جۇك تاسىمالدارىنىڭ كولەمىن ۇلعايتۋعا مۇمكىندىك بەرەدى. بۇدان كەيىن ق ر پرەمەر- ءمينيسترى ەكىنشى دەڭگەيلى بانكتەردىڭ باسشىلارىمەن جانە ەلىمىزدىڭ قارجى سەكتورىنىڭ ءىرى قاتىسۋشىلارىمەن كەزدەسۋ وتكىزدى.
قاتىسۋشىلار كەڭەس بارىسىندا ءبىرقاتار اسا وزەكتى تاقىرىپتاردى تالقىلادى، سولاردىڭ ىشىندە قازاقستان رەسپۋبليكاسىندا ەلەكتروندى ساۋدانى دامىتۋدىڭ 2018-2020 -جىلدارعا ارنالعان جول كارتاسىنىڭ جوباسىن، زەينەتاقى قورىنىڭ جانە مىندەتتى مەديتسينالىق ساقتاندىرۋ قورىنىڭ اكتيۆتەرىن باسقارۋ ماسەلەلەرىن، سونداي- اق، جەكە تۇلعالاردى سيفرلىق سايكەستەندىرۋ، قور نارىعى جانە سيفرلاندىرۋ جاعدايىندا ساقتاندىرۋ نارىعىن دامىتۋ ماسەلەلەرىن تالقىلادى. كەزدەسۋدە قازاقستاننىڭ قارجىگەرلەر قاۋىمداستىعىنىڭ كەڭەسى ءتوراعاسىنىڭ م. ا. يۋليا ياكۋپبايەۆا، «حالىق بانكىنىڭ» باسقارما ءتورايىمى ءۇمىت شاياحمەتوۆا، ForteBank باسقارما ءتوراعاسى ماعجان اۋەزوۆ، «سبەربانك كازاحستانا» باسقارما ءتوراعاسى الەكساندر كامالوۆ، «سەسنابانك» باسقارما ءتوراعاسى ەرجان ءتاجياقوۆ، «بانك سەنتركرەديت» باسقارما ءتوراعاسى عالىم قۇسايىنوۆ، SkyBridgeInvest ينۆەستيتسيالىق كومپانياسىنىڭ باسقارما ءتورايىمى شولپان اينابايەۆا، RBK بانكىنىڭ ديرەكتورلار كەڭەسىنىڭ مۇشەسى ءانۋار سايدەنوۆ، ەۋرازيا بانكىنىڭ باسقارما ءتوراعاسى پاۆەل لوگينوۆ، سونداي- اق، قازاقستان ساقتاندىرۋشىلارى قاۋىمداستىعىنىڭ باس ديرەكتورى ۆيتاليي ۆەريەۆكين ءسوز سويلەدى.
ق ر پرەمەر- ءمينيسترىنىڭ جۇمىس ساپارى اياسىندا، 24 - قازاندا، ءبىرقاتار شارالار جوسپارلانعان، ولاردىڭ ىشىندە، «ە ى د ۇ- نىڭ ەۋرازيا اپتالىعى - 2017: بىرگە وركەندەۋگە ارنالعان اشىق نارىقتار» فورۋمىنا قاتىسۋ، «اتامەكەن» كاسىپكەرلەردىڭ وڭىرلىك كەڭەسىنىڭ مۇشەلەرىمەن شاعىن جانە ورتا بيزنەستى دامىتۋ تۋرالى كەزدەسۋ، الەۋمەتتىك ينفراقۇرىلىم نىساندارىنىڭ، وندىرىستىك كاسىپورىنداردىڭ جۇمىسىمەن جانە قالانىڭ كولىك جۇيەسىن دامىتۋ جوسپارلارىمەن تانىسۋ شارالارى بار.
ايتا كەتۋ كەرەك، باقىتجان ساعىنتايەۆ الماتىنى ەل وڭىرلەرىنە جۇمىس ساپارى اياسىندا ارالايدى. بۇعان دەيىن باتىس قازاقستان، اقتوبە، شىعىس قازاقستان، قىزىلوردا، الماتى، پاۆلودار، سولتۇستىك قازاقستان، قوستاناي، قاراعاندى، اقمولا، اتىراۋ جانە وڭتۇستىك قازاقستان وبلىستارىنا جۇمىس ساپارىمەن بارعان ەدى.