امەريكالىق فانات: مايكل دجەكسون ءتىرى بولعاندا ديماشتىڭ ونەرىن باعالاپ، قولداۋ تانىتار ەدى

 استانا. قازاقپارات - ديماش قۇدايبەرگەننىڭ امەريكادان كەلگەن جانكۇيەرى پاتريسيا گرۋلليون مايكل دجەكسون مەن لۋچانو ءپاۆاروتتيدى جاس تالانتتارعا ىزەت كورسەتە بىلگەن تۇلعالار ەكەنىن ايتادى.

«ولار سەنى (ديماشتى - رەد. ) شىن جۇرەكتەن جاقسى كورگەن بولار ەدى. ەكەۋىنىڭ دە كونسەرتىنە بارىپ، ولاردىڭ جاندى داۋىستاعى ورىنداۋىنا كۋا بولدىم. سەنىڭ اعىلشىن تىلىندە كوبىرەك جازىپ، سويلەي باستاعانىڭا وتە قۋانىشتىمىن جانە ماقتان تۇتامىن. وسى قارقىنىڭنان تايما» ، - دەيدى پاتريسيا گرۋلليون.

امەريكالىق فانات ديماشقا بۇكىل الەم نازارىن قازاقستانعا بۇرعانىن ماقتانىشپەن جەتكىزدى، دەپ جازادى aktobenews.kz.

ايتا كەتەيىك، پاتريسيا تاياۋدا اقتوبەگە كەلىپ كەتكەن بولاتىن. الىستان كەلگەن جانكۇيەردى ديماشتىڭ اناسى سۆەتلانا ايتبايەۆا مەن اقتوبەدەگى فاناتتار توبىنىڭ جەتەكشىسى كۇتىپ الدى. پاتريسيا گرۋلليون ديماش ءبىلىم العان مۋزىكالىق كوللەدجدە بولىپ قايتتى.

«مەنىڭ ارمانىم ورىندالىپ جاتىر. مەن سەنىڭ تالانتىڭا باس يەمىن. ءبىزدىڭ ساعان دەگەن ماحابباتىمىز بۇكىل الەمدەگى ميلليونداعان جانكۇيەرلەردىڭ باسىن قوستى، ءبىز ءوزىمىزدى ۇلكەن ءبىر جانۇياداي سەزىنەمىز. ءبىز سەنى قاتتى جاقسى كورەمىز. ماحاببات جانە سۇيىسپەنشىلىكپەن پاتريسيا» ، - دەپ جازادى ول ءوزىنىڭ جەلىدەگى پاراقشاسىندا.