تۇركيادا قازاقستان مادەنيەتى مەن كينوسىنىڭ كۇندەرى اشىلدى - فوتو
وسى اتاۋلى وقيعاعا بايلانىستى يۋنۋس ەمرە مادەنيەت ورتالىعىندا قازاقستان انشىلەرى مەن شىعارماشىلىق ۇجىمدارىنىڭ سالتاناتتى كونسەرتى بولدى.
«بۇل شارا قازاقستان مەن تۇركيا اراسىنداعى ديپلوماتيالىق قارىم-قاتىناستاردىڭ ورناۋىنىڭ 25 جىلدىعىنان ارنالىپ وتىر. سول ۋاقىتتان بەرى ەكى ەلدىڭ اراسىنداعى ىنتىماقتاستىق ودان ءارى تەرەڭدەي تۇسۋدە. اعىمداعى جىلعى 9- قىركۇيەكتەگى تۇركيا پرەزيدەنتى رەدجەپ تايپ ەردوعاننىڭ استاناعا ساپارىنىڭ وسىناۋ ەكىجاقتى بايلانىستاردىڭ ودان ءارى جاندانا تۇسۋىنە ىقپال ەتتى»، - دەدى سالتاناتتى اشىلۋ راسىمىندەگى قۇتتىقتاۋ سوزىندە ق ر مادەنيەت جانە سپورت ۆيتسە ءمينيسترى اقتوتى رايىمقۇلوۆا.
سونداي-اق ول ەلباسى نۇرسۇلتان نازاربايەۆتىڭ تۇركيامەن ىنتىماقتاستىققا ەرەكشە ماڭىز بەرەتىندىگىن اتاپ ءوتتى.
ءوز كەزەگىندە تۇركيا مادەنيەت جانە تۋريزم ءمينيسترىنىڭ ورىنباسارى حۋسەين يايمان قازاقستاننان كەلگەن قوناقتارعا ىستىق ىقىلاسىن بىلدىرە كەلە، ءوز ەلىنىڭ قاشاندا قازاقستاندىق دوستاردى قۇشاق جايا قارسى الاتىندىعىن جەتكىزدى.
سونىمەن بىرگە ەكى حالىقتىڭ تاريحى، ورتاق مادەني قۇندىلىقتارى تەرەڭنەن تامىر تارتىپ جاتقاندىعىن ەسكە سالدى.
ونەر كەشىنىڭ بارىسىندا قازاق حالقىنىڭ اندەرى مەن بيلەرى، قازىرگى ەسترادالىق شىعارمالار ورىندالدى. قازاقستاندىقتاردىڭ ونەرىنە ءتانتى بولعاندىقتارى سونشالىق، تۇرىك كورەرمەندەرى كونسەرت اياقتالعاننان سوڭ ورىندارىنان تىك تۇرىپ قوشامەت كورسەتتى.