وڭتۇستىكتە الەۋمەتتىك جەلىگە ۇزدىك پوست جازعاندار ماراپاتتالدى

شىمكەنت. قازاقپارات - وڭتۇستىك قازاقستان وبلىسىندا الەۋمەتتىك جەلى قولدانۋشىلارى اراسىندا وتكەن ۇزدىك جازبالار بايقاۋىنىڭ جەڭىمپازدارى ماراپاتتالدى، دەپ حابارلايدى قازاقپارات ءتىلشىسى.

وڭتۇستىك قازاقستان وبلىستىق ىشكى ساياسات باسقارماسىنىڭ تاپسىرىسى بويىنشا «جاڭا ءداۋىر» قوعامدىق بىرلەستىگى مەن قازاقستان جۋرناليستەر وداعىنىڭ وبلىستىق فيليالى ۇيىمداستىرعان «وڭتۇستىك عاجايىپتارى» اتتى بايقاۋعا باس-اياعى 35 ۇمىتكەر قاتىستى.

ولار اعىمداعى جىلدىڭ ناۋرىز-قىركۇيەك ايلارى ارالىعىندا الەۋمەتتىك جەلىدەگى ارنايى پاراقشادا وڭتۇستىك قازاقستان وبلىسىنىڭ 85 جىلدىعىن، ءوڭىردىڭ الەۋمەتتىك-ەكونوميكالىق دامۋىن، تاريحى مەن شەجىرەسىن، ۇلى تۇلعالار مەن ولاردىڭ تۋىندىلارىن ناسيحاتتاۋ بويىنشا ءوز جۇمىستارىن جاريالاعان بولاتىن.

ناتيجيەسىندە 16 ۇمىتكەردىڭ الەۋمەتتىك جەلىدە جاريالاعان پوستتارى ىرىكتەلىپ الىنىپ، ارنايى كوميسسياعا ۇسىنىلدى. بايقاۋ قورىتىندىسى بويىنشا 1-ورىن مەن 300 مىڭ تەڭگەنى جۋرناليست كەڭەس يسمايلوۆ پەن جەرگىلىكتى بلوگەر داستان باسشيروۆ جەڭىپ الدى.

ال 2-ورىن مەن 200 مىڭ تەڭگە كولەمىندەگى سىياقىنى ءۇش قاتىسۋشى يەلەندى. سول سياقتى 3-ورىن مەن ىنتالاندىرۋ سىيلىقتارى دا ءبىرقاتار ازاماتتارعا بەرىلدى.

ايتا كەتەيىك، شارا بارىسىندا ەڭ كوپ پوست (92 پوست) جازعان تانىمال جۋرناليست كەڭەس يسمايلوۆ بايقاۋ اياسىندا جاريالانعان جازبالاردى وزگە وبلىس تۇرعىندارى مەن شەتەلدىكتەر دە قىزىعا وقىعانىن ايتىپ ءوتتى.

ال تاريحشى، بايقاۋدىڭ بەلسەندى قاتىسۋشىسى ءومىر شىنىبەك ۇلى «وڭتۇستىكتىڭ ەرەكشە جەرلەرىن ءالى دە بولسا كوبىرەك ناسيحاتتاۋ كەرەكتىگىن، بۇل ءوڭىردىڭ ءالى اشىلماعان جاڭا قىرلارىن تانىتۋعا مۇمكىندىك بەرەتىندىگىن اتاپ ءوتتى.

اۆتور: اينۇر اقبايەۆا