استانادا مۇمكىندىگى شەكتەۋلى بالالارعا ارنالعان مەكتەپ-ينتەرناتى اشىلادى

استانا. قازاقپارات - استانادا ارنايى كوررەكتسيالىق مەكتەپ-ينتەرناتى اشىلادى.

كوكتال كەنتىندە ورنالاسقان 375 ورىندىق ءبىلىم وشاعى قاراشا ايىندا پايدالانۋعا بەرىلەدى، دەپ حابارلايدى قازاقپارات ەلوردا اكىمدىگىنىڭ مەديا ورتالىعىنا سىلتەمە جاساپ.

وسى كۇنى باس قالادا 3 مىڭعا جۋىق بالا ينكليۋزيۆتىك ءبىلىم بەرۋمەن قامتىلادى. قالالىق ءبىلىم باسقارماسىنىڭ جەتەكشىسى ءانۋار جانعوزيننىڭ ايتۋىنشا، استانادا ەرەكشە ءبىلىم بەرۋدى قاجەت ەتەتىن 10297 بالا پسيحو-مەديكو-پەداگوگيكالىق كونسۋلتاتسيادا (پ م پ ك) تىركەۋدە تۇر، ونىڭ 2151 - 0-18 جاس ارالىعىنداعى مۇگەدەكتەر.

«2849 بالا ينكليۋزيۆتىك ءبىلىم بەرۋمەن قامتىلعان. مەكتەپكە دەيىنگى 13 مەكەمە مەن جالپى ءبىلىم بەرەتىن 51 مەكتەپتە سوماتيكالىق جانە اۋىتقۋى بار ناۋقاس بالالار ءبىلىم الۋدا. بۇعان قوسا، 230 بالا جالپى ءبىلىم بەرەتىن مەكتەپ نەگىزىندە ۇيدەن وقىتىلىپ جاتىر»، - دەدى قالالىق ءماسليحاتتىڭ الەۋمەتتىك-مادەني دامۋى جونىندەگى تۇراقتى كوميسسيانىڭ وتىرىسىندا ءبىلىم باسقارماسىنىڭ جەتەكشىسى ءانۋار جانعوزين.

ونىڭ ايتۋىنشا، ەلورداداعى 84 مەكتەپتىڭ 75 ىندە نەمەسە جالپى مەكتەپتەردىڭ %89 ينكليۋزيۆتىك ءبىلىم الۋعا قاجەتتى جاعداي جاسالعان. پاندۋستار مەن قابىرعاعا قول سۇيەنىشتەرى جاسالدى، دارەتحانالار قايتا جاساقتالدى، تاكتيلدى جولدار مەن 8 مەكتەپتە جەدەل ساتى ورناتىلدى. بۇعان قوسا ءۇش مەكتەپكە مۇمكىندىگى شەكتەۋلى بالالاردى ينۆاتاكسيمەن جەتكىزۋ جولعا قويىلعان.