قارا قىلدى قاق جارعان بيلەر قازىرگى سۋديالارعا ۇلگى - پروفەسسور

  كوكشەتاۋ. قازاقپارات - اقمولا وبلىستىق سوتى مەن ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى بىرلەسىپ، «قازاق دالاسىنىڭ بيلەر سوتى - ەگەمەندى ەلىمىزدىڭ سوت- قۇقىقتىق جۇيەسىنىڭ نەگىزى» اتتى عىلىمي- پراكتيكالىق كونفەرەنتسياسىن وتكىزدى،

  دەپ حابارلايدى قازاقپارات ءتىلشىسى.

ۋنيۆەرسيتەت عيماراتىندا ۇيىمداستىرىلعان شاراعا وبلىس اكىمىنىڭ ورىنباسارى اينا ءمىسىرالىموۆا، جوعارعى سوتتىڭ سۋدياسى، جوعارعى سوت كەڭەسىنىڭ مۇشەسى ءادىل قۇرىقبايەۆ، عالىمدار مەن قۇقىق قورعاۋ سالاسىنىڭ باسشىلارى، قوعامدىق ۇيىمداردىڭ وكىلدەرى قاتىستى. 

عىلىمي- پراكتيكالىق كونفەرەنسيادا جوعارعى سوتتىڭ سۋدياسى ءادىل قۇرىقبايەۆ جوعارعى سوت ءتوراعاسى قايرات ءماميدىڭ قۇتتىقتاۋ حاتىن وقىپ بەردى. وبلىس اكىمىنىڭ ورىنباسارى اينا ءمىسىرالىموۆا ەلباسىمىزدىڭ «بولاشاققا باعدار: رۋحاني جاڭعىرۋ» ماقالاسىندا كوتەرىلگەن باستامالاردى جۇزەگە اسىرۋ باعىتىندا اقمولا وبلىسىندا دا كوپتەگەن ءىس- شارالار وتكىزىلىپ، ناقتى جۇمىستار اتقارىلىپ جاتقانىن ايتا كەلە، بۇگىنگى وتكىزىلىپ وتىرعان كونفەرەنسيا دا رۋحاني جاڭعىرۋعا ءۇن قوسقان ماڭىزدى شارا بولاتىنىنا سەنىم ءبىلدىردى.

ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ رەكتورى، تەحنيكا عىلىمدارىنىڭ دوكتورى، پروفەسسور ءابدىمۇتالىپ ءابجاپپاروۆ «قازاقتىڭ بي- شەشەندەرى قايتالانباس تاريحي تۇلعالار. قازاقتان باسقا ءبىر دە ءبىر حالىقتا ەل ءومىرىنىڭ بارلىق قىرلارىنا ارالاساتىن قازاق بيلەرى سياقتى تۇلعالار بولماعان. قارا قىلدى قاق جارعان قازاق بيلەرىنىڭ بيلىگى قازىرگى سۋديالارعا ۇلگى»، دەپ اتاپ ءوتتى.

 سونىمەن قاتار، وبلىستىق سوتتىڭ ءتوراعاسى دوسجان ءامىروۆتىڭ «بيلەر سوتى - تاۋەلسىز ەلىمىزدىڭ سوت- قۇقىقتىق جۇيەسىنىڭ نەگىزى» اتتى بايانداماسى تىڭدالدى.

اۆتور: اسلان وسپانوۆ