الماتىدا كولىك كەپتەلىسىن ازايتۋدىڭ جولدارى ايتىلدى

الماتى. قازاقپارات - الماتىدا جول قوزعالىسىن ۇيىمداستىرۋدىڭ كەشەندى سىزباسى تالقىلاندى، دەپ حابارلايدى قازاقپارات ءتىلشىسى.

  جيىندا بۇگىنگى تاڭدا الماتىدا 467 مىڭ كولىك تىركەلگەن. الماتى وبلىسىندا تىركەلگەنى 485 مىڭ، ولاردىڭ 300 مىڭنان استامى قالاعا قاتىنايتىنى ايتىلدى.

 رەسمي ستاتيستيكاعا جۇگىنسەك، 2017 -جىلدىڭ ماۋسىم ايىندا مەگاپوليس حالقىنىڭ سانى 1ميلليون 777 مىڭ تۇرعىنعا جەتكەن. الماتى قالاسى اكىمىنىڭ ورىنباسارى مۇرات دارىبايەۆ قازىرگى كەزدە كولىكتى وتكىزۋ قابىلەتىن ۇلعايتۋ جونىندەگى رەفورمانىڭ تولىق قارقىن العانىن اتاپ ءوتتى.

 «مەگاپوليس ورتالىعىندا قوعامدىق كولىكتەردىڭ جولاقتارى ەرەكشەلەنۋدە، 30 جولايرىعى سالىنۋدا، جاياۋ جۇرگىنشى ايماعى جاسالىپ جاتىر. قالادا كولىك تۇراقتارىن اباتتاندىرۋ جۇمىستارى جالعاسۋدا»، - دەدى ول.

 الماتى اكىمدىگى قالانىڭ كوشە- جول جۇيەسىنىڭ كولىكتى وتكىزۋ قابىلەتىن ارتتىرۋعا ىقپال ەتەتىن ج ق ۇ ك س (جول قوزعالىسىن ۇيىمداستىرۋدىڭ كەشەندى سىزباسى) جوباسىن جاساۋعا تاپسىرىس بەرگەن ەدى.

 «قالادا قاربالاس ساتتە كولىك قوزعالىسىنىڭ جىلدامدىعى 19 ك م ساعاتقا دەيىن تومەندەيدى. الماتىدا 2017-2023 -جىلدارى جول قوزعالىسىن ۇيىمداستىرۋدىڭ كەشەندى سىزباسى جوباسى بارىسىندا ۋاقىتتىڭ تىعىزدىعى كەزىندە كولىك قوزعالىسىنىڭ ورتاشا جىلدامدىعى 25 ك م ساعاتقا جەتەدى»، - دەدى الماتى قالاسى جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى تالعات حوسچانوۆ.

 شارا بارىسىندا جوعارى جىلدامدىقتاعى اۆتوبۋس قاتىناسىنىڭ 1- كەزەگىنىڭ قۇرىلىسى تالقىلاندى. ونىڭ 2- كەزەگىنىڭ قۇرىلىسى جوبالانۋدا، سونىمەن قاتار جەڭىل رەلستى كولىك (ج ر ك) جوباسىن جۇزەگە اسىرۋ ماسەلەسى ءسوز بولدى، جاڭا جولاقتار پايدا بولۋدا، جاڭا كولىك باعىتتارى اشىلۋدا، ۆەلوبەكەتتەر جانە باسقالارى جاسالۋدا.

 ايتا كەتەيىك، ج ق ۇ س جوباسى بويىنشا قۇرمانعازى جانە شيەۆچەنكو كوشەلەرى بويىندا ءبىر جاقتى كولىك قوزعالىسى جاسالدى.

«الماتى قالاسى اۋاسىنىڭ ساپاسى بارىنشا تومەن. كوپ جىلدان بەرى اۋانىڭ لاستانۋ يندەكسى تۇراقتى تۇردە 10 بىرلىكتەن اسىپ تۇسەدى. قارا توزاڭ قالانىڭ باسىم بولىگىن قامتىعان، بۇل توزاڭنىڭ 90  پايىزى كولىكتەن شىعادى. جول قوزعالىسىن ۇيىمداستىرۋدىڭ كەشەندى سىزبا (ج ق ۇ ك س) جوباسى جۇزەگە اسسا مەگاپوليس ەكولوگياسى جاقسارادى، كولىك پروبلەماسى شەشىمىن تابادى، قالا تۇرعىندارى ءۇشىن جايلى جاعداي جاسالاتىن بولادى»، - دەدى تالعات حوسچانوۆ.

 اۆتور: الماس مۇقاش ۇلى