تالعات تەمەنوۆتىڭ «ءبىزدىڭ قالانىڭ حانزاداسى» فيلمى پروكاتقا شىقتى
- دەپ حابارلايدى tengrinews.kz ءتىلشىسى كينوستۋديا باسپا ءسوز قىزمەتىنە سىلتەمە جاساپ.
رەجيسسەرى ءارى سسەناري اۆتورى - قازاقستاننىڭ حالىق ءارتيسى - تالعات تەمەنوۆ. «ادامدار اراسىنداعى بولتىرىك»، «قىزعىش قۇس»، «ماحاببات بەكەتى» سىندى فيلمدەرىمەن كورەرمەنگە جاقسى تانىس تالگات تەمەنوۆتىڭ جاڭا كينوتۋىندىسى جالعىزدىقتىڭ كۇيىن كەشىپ جۇرگەن بالالار ءۇيىنىڭ 6 جاسار تاربيەلەنۋشىسى مەن قارتتار ءۇيىنىڭ ارداگەرى اراسىنداعى دوستىعى تۋرالى باياندايدى.
«ءبىزدىڭ قالانىڭ حانزاداسى» - بۇل بيبول ەسىمدى ەرەكشە بالا مەن مۋزىكانت قاسىمحان ەسىمدى قاريا تۋرالى اسەرلى وقيعا. فيلمنىڭ نەگىزگى جەلىسى - بالا مەن قارتتىڭ كەزدەيسوق كەزدەسۋى بولىپ تابىلادى. بۇل فيلمدەگى دراماتيزم ءبىر- بىرىنە مۇلدە بوتەن باس كەيىپكەرلەردىڭ سوڭىندا ەتەنە جاقىن بولىپ كەتۋلەرى. فيلم - ادامنىڭ ادامگەرشىلىك قاسيەتتەرىنىڭ ارقاسىندا عانا شىن باقىتقا جەتۋگە بولاتىنىن كورسەتەدى. فيلمنىڭ ءتۇسىرۋ جۇمىستارى استانادا جانە اقمولا وبلىسىنىڭ بۋراباي اۋىلىندا ءوتتى.
باستى رولدەردى انۋار تولەۋگاجى جانە ق ر ەڭبەك سىڭىرگەن قايراتكەرى تولەۋبەك ارالباي («جاۋجۇرەك مىڭ بالا»، «جويۋشى»، «تىعىرىقتان جول تاپقان») سومدادى. سونىمەن قاتار، فيلمگە ق. قۋانىشبايەۆ اتىنداعى قازاق مۋزىكا جانە دراما تەاترىنىڭ (استانا قالاسى) اكتەرلەرى تۇسكەن. ەسكە سالايىق، «ءبىزدىڭ قالانىڭ حانزاداسى» فيلمىنىڭ تۇساۋكەسەرى (جۇمىس اتاۋى «بيبول») بيىل 1 - ماۋسىمدا، حالىقارالىق بالالاردى قورعاۋ كۇنىنە وراي استانا قالاسىندا وتكەن بولاتىن. سونىمەن قاتار، اتالمىش كينوتۋىندى قىركۇيەك ايىندا رەسەيدە وتكەن 2 -حالىقارالىق «ەۋرازيالىق كوپىر» كينوفەستيۆالىنىڭ نەگىزگى باعدارلاماسى شەڭبەرىندە كورسەتىلدى. قازاقستاندىقتار «ءبىزدىڭ قالانىڭ حانزاداسى» فيلمىن بۇگىن - 19 - قازاننان باستاپ ەلىمىزدىڭ كينوتەاترلارىنان كورە الادى.
Kaz.tengrinews.kz