مەركەل تۇركياعا كومەكتى شەكتەۋگە شاقىردى

  استانا. قازاقپارات - گەرمانيا كانسلەرى انگەلا مەركەل ەۋروپالىق وداقتان بىرىگىپ، تۇركياعا كورسەتىلىپ كەلە جاتقان كومەكتى ازايتۋعا شاقىردى.

 بۇل تۋرالى نەمىس ۇكىمەت باسشىسى بەلگياداعى سامميتتە مالىمدەدى. ايتۋىنشا، مۇنداي باستاماعا وسى ەلدەگى دەموكراتيالىق قۇندىلىقتاردىڭ بۇزىلىپ، اياققا تاپتالۋى تۇرتكى بولىپ وتىر.

«سوندىقتان وداق تۇركياعا ۇيىمعا مۇشە بولۋعا ۇمىتكەر مەملەكەت رەتىندە كورسەتىلىپ وتىرعان قولداۋدى شەكتەۋ كەرەك»، - دەيدى.

الايدا ەردوعان قاۋىمداستىققا كىرۋ پروتسەسىن بۇعان دەيىن بىرنەشە رەت سىنعا العان ەدى. ونىڭ ويىنشا، ەۋرووداق تۇركيامەن كەلىسسوزدى ۇزاققا سوزىپ، كوپ كۇتتىرۋگە ماجبۇرلەپ وتىر. سوندىقتان انكارا قازىر بۇل ۇيىمعا كىرۋدەن باس تارتۋعا دايىن. ال رەسمي مالىمەتكە قاراعاندا، ەۋروپالىق وداق تۇركياعا 2020 -جىلعا دەيىن جىل سايىن 4 جارىم ميلليارد ەۋروعا جۋىق كومەك كورسەتۋدى قاراستىرىپ قويعان.

انگەلا مەركەل، گەرمانيا كانسلەرى:

 - تۇركياداعى ادام قۇقىقتارىنا قاتىستى جاعداي كوڭىل كونشىتپەيدى. بۇل ەلدىڭ بيلىگى بارعان سايىن زاڭنىڭ ۇستەمدىك قۇرعان دەموكراتيالىق پرينتسيپتەرىنەن باس تارتىپ كەلەدى. وسى ورايدا گەرمانيانىڭ كەيبىر ازاماتتارى تۇركيادا زاڭسىز تۇرمەگە قامالعانىن دا ايتا كەتكىم كەلەدى. سوندىقتان ءبىز ەۋروكوميسسيادان وداققا مۇشە بولۋدىڭ الدىندا كورسەتىلەتىن كومەكتى قىسقارتۋدى سۇرايمىز.

www.24.kz