اقتوبەدە مۇناي مەن گازدىڭ كولەڭكەلى اينالىمىن جويۋ ماسەلەسى تالقىلاندى
فورۋمعا پروكۋراتۋرا، ىشكى ىستەر ورگاندارى، شەكارا قىزمەتىنىڭ وكىلدەرى قاتىستى، دەپ حابارلايدى قازاقپارات ءتىلشىسى. اقتوبە قالاسىندا مۇناي مەن گازدىڭ كولەڭكەلى اينالىمى ماسەلەلەرى» اتتى ءوڭىرارالىق فورۋم ۇيىمداستىرىلدى. فورۋمعا قر باس پروكۋرورىنىڭ ورىنباسارى اندرەي لۋكين، بىرنەشە مينيسترلىك وكىلى مەن اتىراۋ، باتىس قازاقستان، ماڭعىستاۋ وبلىستارى اكىمدەرىنىڭ ورىنباسارلارى قاتىستى. فورۋمدا مۇناي مەن گازدى ۇرلاۋ فاكتىسىن توقتاتۋ، مەملەكەتتىك شىعىندى قايتارۋ، قاۋىپسىزدىك تەحنولوگياسىن ەنگىزۋ، ەسەپتەۋ قۇرالدارىن قوندىرۋ جانە مۇناي مەن گازدىڭ كولەڭكەلى بيزنەسىن توقتاتۋ ءۇشىن كۇش بىرىكتىرۋ جولدارى تالقىلاندى. سەبەبى، مۇناي ۇرلىعى مەملەكەتكە شىعىن اكەلەدى. ماسەلەن، سوڭعى ءۇش جىلدا ەلىمىزدە 1 ميلليون توننا «قارا التىن» ۇرلانىپ، كولەڭكەلى اينالىم كەزىندە 100 ميلليارد تەڭگە شىعىن تىركەلگەن.
«اقتوبە - مۇنايلى ءوڭىر. بارلىعى 29 كەن ورنىنان جىل سايىن 6 ميلليون توننا مۇناي، 7 ميلليارد تەكشە مەتر گاز ءوندىرىلىپ جاتىر. ەلباسى نۇرسۇلتان نازاربايەۆ وندىرىسكە جاڭا تەحنولوگيانى ەنگىزۋدى تاپسىردى. الداعى 5 جىلدا كەن ورىندارى 60 ميلليارد تەڭگە باعىتتاپ، تەحنولوگيانى جاڭارتۋى كەرەك. ءبىز مينيسترلىكتەرمەن بىرگە ۇنەمى تەكسەرۋ جۇمىستارىن جۇرگىزىپ تۇرامىز. اقتوبە ەكونوميكاسىنىڭ 15 پايىزى مۇناي- گاز سالاسىندا تيەسىلى. بۇل وندىرىستە 15 مىڭنان استام ادام جۇمىس ىستەيدى. ال مۇناي- گازدىڭ كولەڭكەلى اينالىمى بۇل بيۋدجەت كىرىسىنىڭ ازايۋىنا اكەلىپ سوعادى، ينۆەستيتسيالىق كليمات وزگەرەدى. نەگىزى مۇناي- گاز ۇرلىعى سول سالانىڭ جۇمىسشىلارىمەن، كۇزەتشىلەرمەن بايلانىستى بولىپ تۇر. كەيدە بۇرعىلاۋ جۇمىستارى توقتاپ تۇرعان مۇناي ۇڭعىماسى دۇرىس بەكىتىلمەي، ۇرلىق جاسالادى» ، - دەدى اقتوبە وبلىسىنىڭ اكىمى بەردىبەك ساپاربايەۆ.
اقتوبەدەگى كەن ورىندارىندا مۇناي ۇرلىعى توقتاعان ەمەس. ماسەلەن، كەڭقياقتاعى كەن ورنىندا سوڭعى جىلدارى 9 مىڭ توننا مۇناي ۇرلاندى. ۇيىمداسقان قىلمىستىق توپ مۇشەلەرى ۇستالىپ، 20 كۇدىكتى قاماۋعا الىندى. قىلمىستىق ءىس بويىنشا تەرگەۋ جۇمىستارى اياقتالدى. وبلىس اكىمى بەردىبەك ساپاربايەۆ فورۋم كەزىندە زاڭسىز مۇناي- گاز تاسىمالداۋ فاكتىسىنە قاتىستى قىلمىستىق جاۋاپكەرشىلىكتى ارتتىرۋدى ۇسىندى. سەبەبى، 200-300 اەك كولەمىندە ايىپپۇل سالۋ جەڭىل جازا سانالادى. سونىمەن قاتار، سۇيىتىلعان گازعا ەسەپتەۋ قۇرالىن قوندىرىپ، مۇناي مەن گازدىڭ قايدان شىعىپ، قايدا باراتىنىن انىقتاۋ ءۇشىن كەدەن كودەكسىنە وزگەرتۋلەر مەن تولىقتىرۋلار ەنگىزۋ تۋرالى ايتىلدى.
«ەنەرگەتيكا مينيسترلىگىنە ورتالىقتاندىرىلعان اقپاراتتار بازاسىن قۇرۋدى ۇسىنامىز. ول جەردە مۇنايدىڭ حيميالىق قۇرامى تۋرالى انىق جازىلۋى ءتيىس. باقىلاۋشى ورگاندار وسى دەرەك بويىنشا مۇنايدىڭ قۇرامىن ءبىلىپ، ونىڭ قايدان ەكەنىن انىقتاي الادى. جول- پاترۋلدىك پوليتسياسى، كەدەن، شەكارا قىزمەتكەرلەرىنە قارجى مينيسترلىگى، مەملەكەتتىك كىرىستەر كوميتەتىنىڭ بازاسىنا كىرۋ مۇمكىندىگى بەرىلگەنى ءجون. باستىسى، بارلىق مەملەكەتتىك ورگان بىرلەسە جۇمىس ىستەۋى كەرەك. سول كەزدە ناتيجە بولادى» ، - دەدى ب. ساپاربايەۆ.
اۆتور: التىناي ساعىندىقوۆا