موڭعوليادا بۇگىنگە دەيىن قانشا قازاق مينيستر بولدى؟

   استانا. قازاقپارات - كۇنى كەشە موڭعوليانىڭ جاڭادان جاساقتالعان ۇكىمەتىنىڭ مينيسترلەر كابينەتىنە ۇسىنىلعان سول ەلدەگى قانداسىمىز بادەلحان قابدىسىلام ۇلى قۇرىلىس، قالا قۇرىلىم ءمينيسترى بولىپ سايلاندى.

 وسى ورايدا موڭعوليا رەسپۋبليكاسىندا قازىرگە دەيىن مينيسترلىك قىزمەتتى اتقارعان قازاقتاردى تىزبەلەپ كورەيىك.

تىلەيحان ورىن ۇلى. موڭعوليا قازاقتارى اراسىنان تۇڭعىش رەت 1962-1965 -جىلى، 1968-1982 -جىلدارى موڭعول حالىق رەسپۋبليكاسىنىڭ قۇرىلىس ءمينيسترى قىزمەتىن اتقارعان. Kaznews.mn سايتىنىڭ حابارلاۋىنشا، قۇرىلىس سالاسىنا سىڭىرگەن ەڭبەگى ءۇشىن ۇلانباتىر قالاسىنداعى قۇرىلىس پوليتەحنيكالىق كوللەجى بۇگىنگى تاڭدا قانداسىمىزدىڭ اتىمەن اتالادى.

ماۋلەت ۇتقان ۇلى. قانداسىمىز 1980-1987 -جىلدارى گەولوگيا، تاۋ- كەن ءمينيسترى، 1987-1991 -جىلدارى تابيعات قورعاۋ ءمينيسترى بولعان. نالايحان شاحتاسىنىڭ دامۋىنا زور ۇلەس قوسقان ماۋلەت ۇتقان ۇلى وندا جاڭا تەحنيكا مەن تەحنولوگيالىق جاڭارتۋدى ەنگىزگەنى ءۇشىن «مەملەكەتتىك سىيلىق يەگەرى» اتانعان.

زاردىحان قينايات ۇلى. موڭعوليانىڭ توتاليتارلىق جۇيەدەن نارىقتىق جۇيەگە اۋىسۋ كەزەڭىندە، ياعني 1991-1992 -جىلدارى موڭعوليانىڭ مينيسترلەر كەڭەسى ءتوراعاسىنىڭ ورىنباسارى قىزمەتىن زاردىحان قينايات ۇلى اتقارعان.

ساندالحان رازدىق ۇلى. 1992-1996 -جىلدارى موڭعوليانىڭ كولىك- كوممۋنيكاتسيا جانە ينفراقۇرىلىم ءمينيسترى بولعان. ساندالحان رازدىق ۇلى موڭعوليا پارلامەنتىنە بايان- ولگەيدەن ەكى مارتە سايلانعان.

موڭعول ەلىندە ۆيتسە- مينيسترلىك قىزمەتتى اتقارعان قانداستارىمىز:

تەگىسشىل ادريسا ۇلى - گەولوگيا، تاۋ كەن ونەركاسىپ ۆيتسە- ءمينيسترى،

تولەۋباي نىعارباي ۇلى - قۇرىلىس ۆيتسە- ءمينيسترى،

احمەت جۇپباي ۇلى - مادەنيەت ۆيتسە- ءمينيسترى،

قۇسايىن قالقىما ۇلى - جەڭىل جانە ازىق تۇلىك ونەركاسىپ ۆيتسە- ءمينيسترى،

بولات اجحان ۇلى - تابيعات قورعاۋ ۆيتسە- ءمينيسترى،

كۇلاندا شوناي قىزى - ءبىلىم جانە عىلىم ۆيتسە- ءمينيسترى،

ساۋلە ءجانىمحان قىزى - ازىق تۇلىك، اۋىل شارۋاشىلىق جانە جەڭىل ونەركاسىپ ۆيتسە- ءمينيسترى،

ەرجان قابىشاي ۇلى - جول ترانسپورت ۆيتسە- ءمينيسترى،

بادەلحان قابدىسىلام ۇلى - ونەركاسىپ ۆيتسە- ءمينيسترى.