ارحيۆ قۇجاتتارى لاتىن الىپبيىنە اۋىستىرىلمايدى

الماتى. قازاقپارات - ورتالىق مەملەكەتتىك ارحيۆتەگى تاريحي قۇجاتتار لاتىن گرافيكاسىنا تۇسىرىلمەيدى.

بۇل تۋرالى مەملەكەتتىك مەكەمەنىڭ باسشىسى ابزال بوتانوۆ ۇجىممەن وتكەن جينالىستا ايتتى، دەپ حابارلايدى قازاقپارات ءتىلشىسى.

مۇنداي شەشىم مەملەكەت باسشىسىنىڭ لاتىن الىپبيىنە كوشۋ تۋرالى ۇسىنىسىن تالقىلاۋ بارىسىندا ءبىراۋىزدان قابىلدانعان.

«ارحيۆتە ساقتالىپ كەلگەن قۇجاتتار لاتىن الىپبيىنە اۋىستىرىلمايدى. مەنىڭ ويىمشا بۇعان قاجەتتىلىك تۋىپ تۇرعان جوق. كيريلليتسا قارپى ءبارىبىر ۇمىتىلمايدى. سونىمەن قاتار، مۇندا ميلليوننان استام قۇجات بار. ونداي ۇلكەن قازىنانى لاتىن الىپبيىنە اۋدارۋ ۇلكەن شىعىندى تالاپ ەتەدى»، - دەدى مەكەمە ديرەكتورى ابزال بوتانوۆ.

الايدا، ونىڭ ايتۋىنشا، بولاشاقتا ارحيۆكە تۇسەتىن قۇجاتتار لاتىن الىپبيىندە جازىلادى.

«بىزدە لاتىن الىپبيىندە ساقتالعان قۇجاتتار دا بار. وتكەن عاسىردىڭ 30-40 جىلدارىنداعى قۇجاتتار كوبىنە لاتىن قارپىندە جازىلعان. ءدال وسى ۋاقىتتا لاتىن ءالىپبيى ەنگىزىلگەن. ءبىز بۇل رەفورمانى باستان وتكىزگەنبىز. سوندىقتان، اسا قيىندىق تۋعىزبايدى دەپ ويلايمىن»، - دەدى ول.

ايتا كەتۋ كەرەك، مۇنداي دوڭگەلەك ۇستەل مەملەكەت باسشىسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىنداعى مىندەتتەر مەن تاپسىرمالاردى جۇزەگە اسىرۋ ماقساتىندا ۇيىمداستىرىلدى.

9- قازاندا اقوردادا مەملەكەت باسشىسى نۇرسۇلتان نازاربايەۆ مەملەكەتتىك ءتىلدى لاتىن الىپبيىنە كوشىرۋ جوباسى بويىنشا جۇمىس توبىنىڭ مۇشەلەرىن قابىلداعان بولاتىن. وندا ەلباسىنا قوعامدىق تالقىلاۋلار بارىسىندا كەلىپ تۇسكەن ۇسىنىستاردى ەسكەرە وتىرىپ ازىرلەنگەن قازاق ءتىلىنىڭ لاتىن قارپىنە نەگىزدەلگەن ءبىرىڭعاي ستاندارتىنىڭ جوباسى ۇسىنىلدى.