شىمكەنتتە «اربات» سالىنادى

استانا. قازاقپارات - شىمكەنت قالاسىندا الداعى جىلى جاياۋ جۇرگىنشىلەرگە ارنالعان «اربات» جوباسى مەن ەسكى قالاشىق كەشەنى جۇزەگە اسىرىلاتىن بولادى، دەپ حابارلايدى قازاقپارات اكىمنىڭ باسپا ءسوز قىزمەتىنە سىلتەمە جاساپ.

بۇل تۋرالى وڭىرلىك كوممۋنيكاتسيالىق ورتالىعىندا وتكەن باسپا ءسوز ءماسليحاتىندا وبلىستىق ساۋلەت جانە قالا قۇرىلىسى باسقارماسىنىڭ باسشىسى ەركىن ءجۇسىپوۆ ءمالىم ەتتى.

بۇدان بولەك، وبلىس اكىمىنىڭ باستاماسىمەن «ورداباسى» مەموريالدىق تاريحي-مادەني كەشەنى ماڭىندا ءۇش ءبيدىڭ ەسكەرتكىشى ورناتىلىپ، «قازىعۇرت» تاريحي-ەتنوگرافيالىق كەشەنى بوي كوتەرمەك.

باسقارما باسشىسىنىڭ ايتۋىنشا، 2017-جىلدىڭ 9 ايىندا وبلىستىق ساۋلەت جانە قالا قۇرىلىسى باسقارماسى 393 ميلليون 978,3 مىڭ تەڭگەنى يگەرگەن. بۇل قارجىعا بيىل ارىس قالاسىنىڭ باس جوسپارىنا وزگەرىستەر ەنگىزىلىپ، شىمكەنت قالاسىنىڭ باس جوسپارىن وزەكتەندىرۋ (اكتۋاليزاتسيا) جوباسى دايارلانعان. سونداي-اق، «قاراشاش انا»، «يبراھيم اتا»، « قىزىر پايعامبار»، «ابدەل ءازيز بابا»، «ءمىرالى بابا» كەسەنەلەرى مەن «كونە وتىرار» ساۋلەتتىك جوباسىن اباتتاندىرۋ، جاڭعىرتۋ ماقساتىندا جوبالار دايارلانعان.

«بۇگىندە شىمكەنت-قاسقاسۋ جانە شىمكەنت-سايرام-تولەبي اۋداندارىنا شىعاتىن بالامالى جولدىڭ جوباسى ازىرلەندى.

شىمكەنت قالاسى اۋماعىنداعى 6 شاتقالعا ەسكيزدىك جوبالارى جاسالىپ، ينۆەستورلاردىڭ ەسەبىنەن ىسكە اسىرىلۋدا. سونىمەن قاتار، قولدانىستاعى اۋەجايدىڭ قورعانىس مينيسترلىگىنىڭ تەڭگەرىمىندە بولۋىنا بايلانىستى جاڭا اۋەجايدىڭ 3 نۇسقاسى دايىندالىپ وتىر»، - دەدى ەركىن ناۋرىزباي ۇلى.

ەلباسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا وبلىس اۋماعىندا قايتا جاڭعىرتۋدى تالاپ ەتەتىن 500 ەسكەرتكىش انىقتالىپتى. ولاردىڭ قاتارىندا شىمكەنت قالاسىنداعى «ەسكى قالاشىق»، «قازىعۇرت» تاريحي-ەتنوگرافيالىق كەشەنى، «قاراۋىل توبە»، «كەرۋەن ساراي»، «قوشقار اتا»، «ورداباسى» مەموريالدىق تاريحي-مادەني كەشەندەرى دە بار.

بۇدان بولەك، «ارىستانباب» ماۆزولەيىنىڭ كىرەبەرىس بولىگى مەن جولدارىن اباتتاندىرۋ كوزدەلىپ وتىر. سونداي-اق، باسقارما شىمكەنت قالا ىشىلىك جولدارىنداعى 12 جولايىرىعىنىڭ ەسكيزدىك جوباسىن ازىرلەپتى. ونىڭ ىشىندە 5 جولايىرىقتىڭ قۇرىلىسىن 2018-جىلى ىسكە اسىرۋ جوسپارلانعان.