ەير استانا ۇشاقتارىندا اقىلى ورىندار پايدا بولدى

  استانا. قازاقپارات - «ەير استانا» اۋە كومپانياسىنىڭ باسپا ءسوز قىزمەتى كومپانيا ۇشاقتارىنا اقىلى ورىنداردىڭ ەنگىزىلۋى جونىندە تۇسىنىكتەمە بەردى، دەپ حابارلايدى قازاقپارات ءتىلشىسى.

  بۇدان بىلاي، اياعىن كەڭگە سالىپ وتىرعىسى كەلگەن ۇشاق جولاۋشىلارى قوسىمشا اقى تولەپ، بيزنەس- كلاسستىڭ 1-قاتارىندا نەمەسە ەكونوم- كلاسستىڭ 1-2 قاتارلارىندا اپاتتىق ەسىك جانىندا وتىرا الادى. «ەير استانانىڭ» باسپا ءسوز حاتشىسى تىلەك ءابدىراحىموۆتىڭ ايتۋىنشا، بۇل ورىندار بۇرىن جولاۋشىلارعا مۇلدەم بەرىلمەيتىن. «بۇعان دەيىن اتالعان ورىندار جولاۋشىلارعا مۇلدەم بەرىلمەيتىن، ولاردى ءتۇرلى جوسپاردان تىس وقيعالار ءۇشىن ساقتاپ وتىراتىن. تولەمدى ساتىلىم كەڭسەلەرى نەمەسە برونداۋ ورتالىعى ارقىلى جۇزەگە اسىرۋعا بولادى. باعاسى 3 مىڭ تەڭگەدەن باستاپ، باعىتقا بايلانىستى جوعارىلاي بەرەدى» ، - دەدى ءابدىراحيموۆ.

قىزمەت قۇنى تۋرالى تولىق اقپاراتتى «ەير استانانىڭ» رەسمي سايتىنان كورۋگە بولادى. ءباسپاسوز قىزمەتىنىڭ حابارلاۋىنشا، مۇنداي جاڭالىق حالىقارالىق تاجىريبەدەن الىنىپ وتىر. قاۋىپسىزدىك تالاپتارىنا سايكەس، كەيبىر جولاۋشى ساناتتارىنا اپاتتىق ورىنداردى برونداۋ قىزمەتى كورسەتىلمەۋى مۇمكىن.

 

 اۆتور: ايجان سەرىكجان قىزى