ەلباسى ت م د مەملەكەت باسشىلارى مەن ج ە ە ك جيىندارىن قورىتىندىلادى

سوچي. قازاقپارات - قازاقستان پرەزيدەنتى نۇرسۇلتان نازاربايەۆ ت م د مەملەكەت باسشىلارى كەڭەسى مەن جوعارى ەۋرازيالىق ەكونوميكالىق كەڭەس جيىندارى تابىستى وتكەنىن ءمالىم ەتتى، دەپ حابارلايدى «قازاقپارات» ح ا ا ءتىلشىسى.

«رەسەي پرەزيدەنتىنىڭ شاقىرۋىمەن سوچيگە كەلىپ، ەكى كۇننىڭ ىشىندە كوپ جيىندارعا قاتىناستىق. ت م د مەملەكەتتەرىنىڭ جينالىسى بولدى.

وعان قوسا ەۋرازيالىق ەكونوميكالىق وداقتىڭ جينالىسىندا كوپتەگەن ماسەلەلەردى شەشتىك. اسىرەسە، سيفروۆيزاتسياعا قاتىستى ءبىرقاتار سۇراقتار تالقىلاندى. بولاشاقتا قازاقستان، رەسەي، بەلارۋس بىرىگىپ، وسى باعىتتا بىرگە جۇمىس ىستەيتىن بولدىق. كەلەسى جىلدىڭ ءبىرىنشى توقسانىندا ءبىزدىڭ ورتاق باعدارلامامىزدى ازىرلەۋ ءۇشىن ۇلكەن فورۋم وتكىزەمىز. ول وتە دۇرىس»، - دەيدى نۇرسۇلتان نازاربايەۆ.

ەل پرەزيدەنتى ءوز سوزىندە جاقىندا «سيفرلى قازاقستان» اتتى كەڭەس وتكىزگەنىن، سوعان بايلانىستى ءتيىستى تاپسىرمالار بەرىلگەنىن اتاپ ءوتتى.

«ەكىنشىدەن، مۇنداعى گەرمانيانىڭ ەڭ ۇلكەن كومپانياسىمەن كەزدەسۋىمىز ماعان وتە ۇلكەن اسەر قالدىردى. مەن ولاردى قازاقستانعا شاقىردىم. الەمدىك ترەندتەن ەلىمىز قالىپ قالماۋى ءۇشىن كومپانيا ساراپشىلارى بىزبەن بىرگە وسى ماڭىزدى جۇمىستى جۇرگىزەتىن بولادى»، - دەيدى مەملەكەت باسشىسى.

نۇرسۇلتان نازاربايەۆ سونىمەن قاتار، رەسەي باسشىسى ۆلاديمير پۋتينمەن بولعان جەكە كەزدەسۋى تۋرالى ايتىپ بەردى.

«رەسەي پرەزيدەنتىمەن بولعان جەكە كەزدەسۋدە كوپ ماسەلەلەردى شەشتىك دەپ ايتپايمىن. رەسەي ءبىز ءۇشىن باستى سەرىكتەس. بىزدە ەشقانداي ماسەلە جوق. جوعارى دەڭگەيدەگى كەزدەسۋلەردە ءجيى كەزدەسەمىز. قازاقستان مەن رەسەيدىڭ قارىم- قاتىناسى وتە جوعارى دەڭگەيدە. تاۋەلسىزدىكتەرىمىزدىڭ 25 جىلدىعىن ءبىز دوستىقتا ءارى ىنتىماقتاستىقتا اتاپ وتەمىز. كەزدەسۋدە ەكى سۇراقتى تالقىلادىق: نەگىزگىسى - قازاقستان بايقوڭىر ارقىلى رەسەيمەن بىرگە عالامدىق مەملەكەتكە اينالايىن دەپ تۇر. سەبەبى، 2022 -جىلى «بايتەرەك» دەگەن ءبىزدىڭ جوبامىز ىسكە اسىرىلاتىن بولادى»، - دەيدى نۇرسۇلتان نازاربايەۆ.

پرەزيدەنتتىڭ ايتۋىنشا، جوبا اياسىندا قازاقستان عارىشقا ۇشۋ ارقىلى وسى باعىتتا ءوز بەتىمەن جۇمىس اتقاراتىن مەملەكەتتەردىڭ ءبىرى بولماق. ويتكەنى، قازاقستاندا قازىرگى تاڭدا ءتورت سپۋتنيك جۇمىس اتقارىپ تۇر. باسقارۋ پۋنكتى بار. پرەزيدەنت ءوز سوزىندە جاڭا اۋماقتا زىمىرانداردى ۇشىرۋ جۇمىسىمەن اينالىسىپ، وتاندىق كادرلاردى دايارلاۋ جۇزەگە اسىرىلاتىنىن جەتكىزدى.

«ەكىنشىدەن، وزبەكستاننىڭ ءوتىنىشى بويىنشا ءبىز قازاقستان ارقىلى ول جاقتاعى مۇناي وڭدەۋشى زاۋىتقا مۇناي جەتكىزۋىمىز كەرەك. بۇل ءۇشىن جۇمىس اتقارىپ، وزبەك دوستارىمىزعا قولداۋ كورسەتۋگە ءازىرمىز. بۇل دا وتە ماڭىزدى»، - دەيدى قازاقستان پرەزيدەنتى.

ەل پرەزيدەنتى سونداي-اق، كولىك جولدارى بويىنشا سۇراقتار قارالعانىن جەتكىزدى.

«باتىس قىتاي - باتىس ەۋروپا باعىتى بويىنشا قازاقستانداعى 2800 شاقىرىمدىق اۆتوكولىك جولىنىڭ قۇرىلىس جۇمىستارى اياقتالدى. ەندى قازاقستاننىڭ شەكاراسىنان ورىنبورعا دەيىنگى 150 شاقىرىمدىق اۋماق قالدى. بۇدان كەيىن بۇل جول ەۋروپاعا تارتادى. بۇل جول كونتەينەرلەردەگى جۇكتى قىتايدان ەۋروپاعا 15 كۇندە اپارادى. تەڭىز جولىمەن ءۇش ەسە ۇزاق ۋاقىتتا جەتەر ەدى. 2020 -جىلى قازاقستان اۋماعى ارقىلى 2 ميلليون كونتەينەر جۇرەتىن بولادى»، - دەدى مەملەكەت باسشىسى.

پرەزيدەنت كەزدەسۋلەر بارىسىندا سونىمەن بىرگە ترانسكونتينەنتتىك مەدياماگيسترالدەردى وتكىزۋ جۇمىسىن تالقىلاعانىن، بۇل بايلانىس ەۋروپا مەن ازيانى جالعاستىراتىنىن ايتىپ ءوتتى.