وڭتۇستىكتەگى تىلدەر مەرەكەسى ەتنوستاردىڭ بىرلىگىن پاش ەتتى - فوتو

شىمكەنت. قازاقپارات - وڭتۇستىك قازاقستان وبلىسىندا قازاقستان حالقىنىڭ تىلدەرى كۇنىنە ارنالعان «مەملەكەتتىك ءتىل - ماڭگىلىك ەلدىڭ ماڭگىلىك ءتىلى» اتتى مەرەكەلىك شارا ءوتتى.

ءىس- شارا اياسىندا وبلىستىق ەتنومادەني بىرلەستىكتەردىڭ ۇلتتىق تاعامدارى مەن قولونەر بۇيىمدارىنىڭ جانە وبلىس اۋماعىندا ارەكەت ەتەتىن تىلدەردى وقىتۋ ورتالىقتارىنىڭ كورمەسى ۇيىمداستىرىلدى، دەپ حابارلايدى وبلىس اكىمىنىڭ باسپا ءسوز قىزمەتى.

«تىلدەر تۋرالى» ق ر زاڭىنىڭ قابىلدانعانىنا 20 جىل تولۋىنا وراي بيىل وڭىردەگى ەتنومادەني بىرلەستىكتەر ءتىلى مەن مادەنيەتى جانە سالت- ءداستۇرى كۇنىن بەرەكەلى اسسامبلەيا شاڭىراعىنىڭ استىندا بىرلەسە وتكىزۋدى ۇيعاردى. مۇنى - دوستىق پەن تاتۋلىقتى تۋ ەتكەن وڭتۇستىكقازاقستاندىق ەتنوس وكىلدەرىنىڭ بايىپتى باستاماسى، ساليقالى شەشىمى دەۋگە بولادى.

سالتاناتتى جيىنعا قاتىسقان وبلىس اكىمى جانسەيىت تۇيمەبايەۆ ءوڭىر تۇرعىندارىن مەرەكەمەن قۇتتىقتاپ، ەلىمىزدە مەملەكەتتىك ءتىل ساياساتىنىڭ جۇزەگە اسۋىنا لايىقتى ۇلەس قوسىپ جۇرگەن ءبىرقاتار ازاماتتاردى ماراپاتتادى. ءوز قۇتتىقتاۋ سوزىندە ايماق باسشىسى ىشكى تۇراقتىلىق پەن قوعامدىق كەلىسىمدى ساقتاۋدا سىندارلى ءتىل ساياساتى ۇلكەن ماڭىزعا يە ەكەنىن ايتتى.

«ءتىل - كەز كەلگەن ۇلتتىڭ بولمىس- ءبىتىمىن دارالايتىن اسىل قازىناسى جانە ۇلتتىق ەرەكشەلىگىن كورسەتەتىن ەڭ ماڭىزدى قۇندىلىق. قازاقستاندا تۇراتىن ەتنوستاردىڭ تىلدەرىنە قۇرمەت كورسەتۋ، ولاردىڭ انا ءتىلى مەن ءتول مادەنيەتىن دامىتۋىنا جاعداي جاساۋ - مەملەكەتىمىزدىڭ ماڭىزدى ستراتەگيالىق مىندەتتەرىنىڭ ءبىرى. رەسپۋبليكا بويىنشا حالىق سانى جاعىنان دا، ءتۇرلى ەتنوستىڭ باسىم شوعىرلانۋىمەن دە ءبىرىنشى تۇراتىن جانە ءتىلى مەن سالت- ءداستۇردىڭ ساقتالۋىمەن ەرەكشەلەنەتىن ولكەنىڭ ءبىرى دە وسى - وڭتۇستىك»، - دەدى اكىم.

بۇگىنگى شاراعا قاتىسۋشىلار دا مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى ۇلتتىق بىرگەيلىكتى ساقتاۋ، ءۇش تىلدە ءبىلىم بەرۋ، ۇلتتىق قود جانە قازاق ءتىلىن لاتىن گرافيكاسىنا كوشىرۋ سىندى بايىپتى باستامالارىن قولداپ، ەتنوستاردىڭ ءتىلى مەن ءتول مادەنيەتىن ساقتاي وتىرىپ، بارشا قازاقستاندىقتاردى بىرىكتىرۋشى مەملەكەتتىك ءتىلدىڭ الار ورنى ەرەك ەكەنىن اتاپ ءوتتى.

سالتاناتتى شارادا قازاقستاندىقتاردىڭ بەرەكەلى بىرلىگىن دارىپتەيتىن «ىنتىماق» پوەتيكالىق كومپوزيتسياسى ساحنالانىپ، ەتنومادەني بىرلەستىكتەردىڭ جانىنداعى شىعارماشىلىق ۇجىمدار دايىنداعان كونسەرتتىك باعدارلاما مەن قازاق ءتىلىنىڭ قارپىن لاتىن گرافيكاسىنا كوشىرۋ تۋرالى حورەوگرافيالىق كومپوزيتسياسى كوپشىلىكتىڭ نازارىنا ۇسىنىلدى.

ايتا كەتەيىك، وڭىردە جۇرگىزىلگەن تالداۋ جۇمىستارىنىڭ ناتيجەسىندە مەملەكەتتىك ءتىلدى ەركىن مەڭگەرگەن تۇرعىندار ۇلەسى - 92,1 پايىز بولسا، ورىس ءتىلىن ۇعاتىندار - 63 پايىزعا، ال، اعىلشىن ءتىلىن بىلەتىندەر - 14 پايىزعا جەتكەن. سونداي- اق، وڭىردەگى ۇلت وكىلدەرىنىڭ 70 پايىزى مەملەكەتتىك ءتىلدى ەركىن مەڭگەرگەن.