ق ر پرەزيدەنتى الماتىداعى ق ر تۇڭعىش پرەزيدەنتى - ەلباسىنىڭ قورىنا باردى
مەملەكەت باسشىسىنا قوردىڭ بيىلعى 8 ايدا اتقارعان جۇمىسى مەن ىسكە اسىرعان جوبالارى، سونداي- اق ونى ودان ءارى دامىتۋ جوسپارى جونىندە ەسەپ بەرىلدى.
«ءبىز بيىلدان باستاپ قوردىڭ جۇمىسىن ءبىرشاما وزگەرتتىك. «سيفرلىق قازاقستان» باعدارلاماسىنا سايكەس، «Smart Zholy» جانە «Method PRO» جوبالارى ازىرلەنىپ، ەنگىزىلدى. بۇكىل قازاقستان بويىنشا كومپيۋتەر باعدارلامالارىن جاساۋمەن اينالىسا باستاعان دارىندى جاستار مەن ولاردىڭ ونىمدەرىن تۇتىناتىن ەلىمىزدىڭ جانە شەتەلدىڭ ءىرى كومپانيالارىمەن ءوزارا بايلانىسىن ورناتۋ - وسى جوبالاردىڭ باستى ەرەكشىلىگى. قور ІТ- تەحنولوگيالار سالاسىنداعى كاسىبي ماماندارعا الداعى ۋاقىتتا دا قولداۋ كورسەتۋدى جوسپارلاپ وتىر، - دەدى قوردىڭ اتقارۋشى ديرەكتورى ق. جۇمابايەۆ.
بۇدان سوڭ نۇرسۇلتان نازاربايەۆقا قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ قورى جانىنداعى الەمدىك ەكونوميكا جانە ساياسات ينستيتۋتىنىڭ جوبالارى مەن پەرسپەكتيۆالارى جونىندە مالىمدەلدى. اتاپ ايتقاندا، ونىڭ ديرەكتورى ە. سالتىبايەۆ ينستيتۋت قىزمەتىنىڭ باستى باعىتىنىڭ ءبىرى رەتىندە بۇكىل ەۋرازيا وڭىرىندەگى بىرەگەي ساراپتامالىق- تالداۋ ورنى - استانا كلۋبىن دامىتۋ جوسپارى تۋرالى باياندادى. قازاقستان پرەزيدەنتى الەمدىك ەكونوميكا جانە ساياسات ينستيتۋتىن جۇيەلى تۇردە نىعايتۋ قاجەت ەكەنىن اتاپ ءوتتى. «ينستيتۋت بۇگىنگى جاعدايمەن عانا شەكتەلىپ قالماۋعا ءتيىس. حالىقارالىق دەڭگەيگە شىعىپ، الەمنىڭ جەتەكشى عالىمدارىمەن كەزدەسۋلەردى جان- جاقتى جاريالاپ كورسەتۋ ارقىلى جۇرتشىلىققا تانىتۋ كەرەك»، - دەدى نۇرسۇلتان نازاربايەۆ.
مەملەكەت باسشىسى قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ قورى جۇمىسىنىڭ تۇجىرىمدامالىق نەگىزىنە ەرەكشە توقتالدى.
«ءبىز قوردىڭ باستى ماقساتىن ايقىن ۇستانۋىمىز كەرەك. ول - قازاقستاندى حالىقارالىق دەڭگەيدە ىلگەرىلەتۋ، ەلىمىزدىڭ يميدجىن جاقسارتۋ، دارىندى جاستارىمىزعا قولداۋ كورسەتۋ جانە ساراپشىلار قوعامداستىعىمەن ءوزارا ءتيىمدى ءىس- قيمىل ورناتۋ. سونداي- اق، يادرولىق قارۋدىڭ تارالۋىنا قارسى كۇرەس جۇرگىزۋ وسى قور جۇمىسىنىڭ ماڭىزدى باعىتى بولۋعا ءتيىس»، - دەدى قازاقستان پرەزيدەنتى.