تويداعى كەلەڭسىز وقيعالاردى الەۋمەتتىك جەلىگە جاريالاعاندار اقشا ۇتىپ الادى - فوتو
جەلى قولدانۋشىلارى اراسىندا جاريالانعان «Ontoi جۇلدىزدارى» اتتى بايقاۋ توي مادەنيەتىن قالىپتاستىرۋ ماقساتىندا قولعا الىنىپ وتىر، دەپ حابارلايدى قازاقپارات ح ا ا ءتىلشىسى.
جەرگىلىكتى تەلەارنا مەن وبلىستىق «نۇر وتان» پارتياسى، وبلىستىق مادەنيەت جانە جاستار ساياساتى، ىشكى ساياسات باسقارمالارى مۇرىندىق بولعان بايقاۋدىڭ باس جۇلدەسىنە 500 مىڭ تەڭگە تىگىلدى. سەبەبى، ەڭ كوپ توي وتكىزەتىن وڭتۇستىك وڭىرىندە كوپتىڭ كوڭىلىنەن شىعۋ ءۇشىن جاساعان كەيبىر قويىلىمدار تالاي تويدىڭ يەسىن دە، قوناقتارىن دا ۇياتقا قالدىرىپ جۇرگەنى بەلگىلى. ياعني، قازاقتىڭ عاجاپ تويىن مازاققا اينالدىرعانداردىڭ ارەكەتى تىيىلار ەمەس. جەلىلەردە جەلدەي ەسكەن مۇنداي كورىنىستەردەن قازىر كوز سۇرىنەدى. وبلىستىق بايقاۋ ەندى وسى جايتتارعا توقتاۋ سالۋدى كوزدەيدى.
«قالاي دەگەندە دە ءبىز توي مادەنيەتىن قالىپتاستىرۋىمىز كەرەك. سول ءۇشىن الەۋمەتتىك جەلى قولدانۋشىلارى اراسىندا ۇزدىك جوبالار بايقاۋىن جاريالاپ، بارلىق بۇقارالىق اقپارات قۇرالدارىنىڭ كومەگىمەن وسىنى ماسەلە ەتىپ كوتەرسەك دەگەن ورتاق شەشىمگە كەلدىك»، - دەيدى جەرگىلىكتى تەلەارنا ديرەكتورى ەرسۇلتان امىربەك.
ۇيىمداستىرۋشىلاردىڭ سوزىنشە، بايقاۋعا جەلىنى قولداناتىن كەز كەلگەن تۇرعىن قاتىسا الادى. باستى تالاپ - تويداعى ەڭ جاقسى نەمەسە ەرسى قىلىقتى جەلىگە جاريالاپ، قوعامعا وي سالۋ. ال، ءماتىننىڭ كولەمى 100 ارىپتەن كەم بولماۋى كەرەك. ەستە ساقتايتىن تاعى ءبىر ماسەلە، جازبا « Ontoi» حەشتەگىمەن جاريالانۋى ءتيىس. سونىمەن قاتار، بايقاۋ كەزىندە وزگە ايماقتاردىڭ دا ەرەكشەلىكتەرىن ۇلگى ەتىپ ۇسىنۋعا بولادى.
«تويدىڭ ماعىنالى، دۇرىس ءوتۋىن استانا، الماتىدان كورسەك بولادى. توي جاسايتىن ادام الدىن الا ءبىر اي نەمەسە 2 اپتا بۇرىن ءوز شاقىرتۋىن بەرەدى. ءسىز سول كەزدە باراتىن- بارمايتىنىڭىزدى ايتاسىز. ويتكەنى داستارحان ازىرلەۋ، كىمدى كىممەن وتىرعىزۋدىڭ ءوزى ۇلكەن مادەنيەت»، - دەيدى وبلىستىق «نۇر وتان» پارتياسى ءتوراعاسىنىڭ ءبىرىنشى ورىنباسارى نۇرماحان جولداسوۆ.
توي مادەنيەتىن قالىپتاستىرۋعا ارنالعان بايقاۋعا ماتەريال جاريالاۋ بۇگىننەن باستاپ جەلتوقساننىڭ ونىنا دەيىن جالعاسادى. جۇلدەلى ورىننان كورىنگىسى كەلەتىندەر اپتاسىنا ءبىر رەت عالامتوردا جازبا قالدىرۋى كەرەك. بايقاۋ جەڭىمپازدارى جىل سوڭىنا قاراي انىقتالماق.