جاڭا سالىق كودەكسىندە يدەولوگيا وزگەرەدى - رۋسلان دالەنوۆ
«جوبانى ازىرلەۋدە «اتامەكەن» پالاتاسى مەن باسقا دا بيزنەس وكىلدەرى قاتىستى. بيزنەستىڭ بارلىق نەگىزدەلگەن ۇسىنىستارى كودەكس جوباسىندا ەسكەرىلدى. جالپى، كودەكس جوباسىندا يدەولوگيانى وزگەرتۋ، ىنتالاندىرۋدى ەنگىزۋ مەن اكىمشىلەندىرۋدى جەڭىلدەتۋ كوزدەلدى. يدەولوگيا ادال سالىق تولەۋشىلەردى قورعاۋعا باعىتتالاتىن بولادى. ەكونوميكانىڭ ءارتۇرلى سالالارى ىنتالاندىرۋمەن قامتىلىپ، اكىمشىلەندىرۋ جەڭىلدەتىلەدى جانە سالىقتى ءوز بەتىنشە تولەۋگە ىنتالاندىرادى»، - دەدى تانىستىرىلىم بارىسىندا ق ر ۇلتتىق ەكونوميكا ءبىرىنشى ۆيتسە- ءمينيسترى رۋسلان دالەنوۆ.
ونىڭ سوزىنە قاراعاندا، بارلىق تۇسىنىكسىز تۇستارى مەن قاتەلەر سالىق تولەۋشىنىڭ پايداسىنا شەشىلەدى. مۇنداي قاعيدات سالىقتىق داۋلاردى ءادىل قاراۋعا مۇمكىندىك بەرەدى. ەگەر دە سالىق تولەۋشى سالىق ورگانىنىڭ تۇسىندىرۋىنە سايكەس ارەكەت ەتكەن بولسا جانە ونىڭ سالدارىنان ۇستانىم وزگەرسە، وندا ايپپۇلدار مەن ءوسىمپۇلدار سالىق تولەۋشىگە سالىنبايدى.
«كەي كەزدەردە سالىق تولەۋشى زاڭناما تالاپتارىن ءتۇسىندىرىپ بەرۋ تۋرالى ءتيستى ورگانعا بارىپ جۇگىنىپ، ايتقان كەڭەستەر بويىنشا ارەكەت ەتەدى. 2-3 جىل وتكەننەن كەيىن سالىقتىق تەكسەرۋ كەلىپ، بۇرىندارى جاسالعان تۇسىندىرۋلەر دۇرىس بولماعانىن العا تارتىپ، سالىق تولەۋشىگە ايپپۇلدار مەن ءوسىم پۇلداردى ۇستەمەلەپ ەسەپتەپ بەرەدى. وسىعان بايلانىستى بۇنداي جاعدايدا اتالعان سانكسيالاردى قولدانباۋدى ۇسىنامىز»، - دەپ ءتۇسىندىردى ءبىرىنشى ۆيتسە- مينيستر.
سونىمەن قاتار ول بيزنەسكە زاڭناماداعى وزگەرىستەردى زەردەلەۋگە كوبىرەك ۋاقىت بەرىلەتىنىن جەتكىزدى. وسى ورايدا تۇزەتۋلەردى 1- شىلدەدەن كەشىكتىرمەي قابىلداۋ ۇسىنىلادى.
«جىل بويى كوپتەگەن تۇزەتۋلەردەن قورعاۋعا باعىتتالعان شارا ەنگىزىلمەك. اتاپ ايتقاندا، بارلىق تۋىنداعان تۇزەتۋلەردى شوعىرلاندىرا وتىرىپ ءبىر زاڭ جوباسىمەن ەنگىزۋ ۇسىنىلىپ وتىر. بۇل بيزنەستىڭ سالىق كودەكسىندەگى بارلىق وزگەرىستەردەن حابارلار بولۋىنا مۇمكىندىك بەردى»، - دەدى دالەنوۆ.
وسى كودەكس جوباسىنداعى ارتىقشىلىقتارعا توقتالعان ول، بۇل جوبانى بيزنەس وكىلدەرى بيزنەس ءۇشىن جازعانىن، سوندىقتان سالاداعى كوپتەگەن كەدەرگىلەر جويىلاتىنىن قاداپ ايتتى.
اۆتور: رۋسلان عابباسوۆ