قازاقستانداعى ينتەرنەت- ساۋدانىڭ الەۋەتى زور - «قازپوشتا» باسشىسى ساكەن سارسەنوۆ
«ەلەكتروندىق كوممەرتسيا بۇگىنگى كۇنى بۇكىل الەم بويىنشا جىلدام دامىپ كەلەدى. بۇرىن نارىقتىڭ نەگىزگى قوزعاۋشى كۇشى ا ق ش بولسا، ال بۇگىندە قىتاي قارقىن الدى. قازىردىڭ وزىندە الەمدەگى ەلەكتروندىق كوممەرتسيا نارىعىنىڭ جىل سايىنعى ءوسۋى 30 پايىزعا جەتتى، قازاقستاندا - 25 پايىز، جانە ءوسىمنىڭ نەگىزگى درايۆەرلەرىنىڭ ءبىرى رەتىندە قىتاي ينتەرنەت- الاڭدارى بولىپ وتىر»، - دەدى ءوز سوزىندە قازپوشتا باسشىسى ساكەن سارسەنوۆ.
«قازپوشتا» باسشىسىنىڭ ايتۋىنشا، جاھاندىق ەلەكتروندىق كوممەرتسيانىڭ كولەمى 2 تريلليون ا ق ش دوللارىنا جەتكەن. ەگەر قازىر الەمدە 3,2 ميلليارد ادام ينتەرنەت قولداناتىن بولسا، ونىڭ جارتىسى (1,6 ميلليارد ادام) ونلاين ساۋدا جاسايدى. ال، قازاقستانداعى ەلەكتروندىق كوممەرتسيا نارىعىنىڭ كولەمى 2016 -جىلعى قورىتىندى بويىنشا 157 ميلليارد تەڭگە بولدى. بۇل دەگەنىمىز بولشەك ساۋدا كولەمىنىڭ 2,6 پايىزى نەمەسە قازاقستاننىڭ جالپى ىشكى ءونىمىنىڭ 0,32 پايىزىنا تەڭ.
«بۇگىندە ەلىمىزدە ەلەكتروندىق ساۋدانىڭ جۇمىس ىستەۋى ءۇشىن بازالىق جۇيە جاقسى دامىعان: 200-دەن استام ينتەرنەت- دۇكەنى، 70-تەن استام لوگيستيكالىق كومپانيا جۇمىس جاسايدى، ءتۇرلى تولەم قۇرالدارى دا بار. قازاقستاندا تۇرعىنداردىڭ 72 پايىزى ينتەرنەتتى قولدانادى، ال ينتەرنەت- دۇكەندەردەن ولاردىڭ تەك 6 پايىزى عانا ساۋدا جاسايدى. بۇل دەرەكتەر ءبىزدىڭ ەلىمىزدە ەلەكتروندىق ساۋدانى ءوسىرۋ ءۇشىن وراسان زور الەۋەت بار ەكەنىن كورسەتەدى»، - دەدى سارسەنوۆ.
قازپوشتا باسشىسى قازاقستاننىڭ ترانزيتتىك الەۋەتىن دە تىلگە تيەك ەتتى. ونىڭ ايتۋىنشا، قازاقستاننىڭ قىتاي مەن ەۋروپا اراسىندا ورنالاسۋىنىڭ ءوزى ەلىمىزدىڭ ترانزيتتىك الەۋەتىن ارتتىرا تۇسەدى.
«اليەكس پرەسس تاراتقان اقپاراتقا سايكەس، 2020 -جىلعا قاراي قىتايدان رەسەيگە جىلىنا - 576 ميلليون، قىتايدان ەۋروپاعا - 250 ميلليون، ال ەۋروپادان قىتايعا 800 ميلليون سالەمدەمە جىبەرىلەتىن بولادى. بۇنىڭ بارلىعى قازاقستان ارقىلى وتەدى. بىلتىر قازاقستان ارقىلى 10 ميلليون سالەمدەمە ءوتتى، بيىل 8 ايدا 15 ميلليون سالەمدەمە رەسەيگە جىبەرىلدى. تەڭىزبەن تىم ۇزاق، ۇشاقپەن تىم قىمبات، قازاقستان ارقىلى وتەتىن تەمىرجول ەڭ قىسقا، ءارى ءتيىمدى جول دەپ قىتايلىقتاردىڭ ءوزى ايتادى»، - دەدى س. سارسەنوۆ.
قازاقستانداعى كىرىس پوشتانىڭ جالپى كولەمىندە قىتايلىق سالەمدەمەلەردىڭ ۇلەسى جىلدان جىلعا ارتىپ كەلەدى جانە بۇل كۇنى 60 پايىزدان اسادى. قازىردىڭ وزىندە قازاقستانعا شەتەلدەن كۇنىنە 20,4 مىڭنان استام سالەمدەمە جەتكىزىلەدى، جانە قازاقستان ىشىندە كۇنىنە 12,4 مىڭ سالەمدەمە، 2020 -جىلعا قاراي نارىق كۇنىنە 300 مىڭ سالەمدەمەگە دەيىن ارتپاق. سونداي- اق قازاقستاندىقتار شەتەلدەردەن الي ەكسپرەسس، امازون، يبەي سياقتى ينتەرنەت- دۇكەندەردەن بەلسەندى تۇردە ساۋدا جاسايدى. سالەمدەمەلەردى جەتكىزۋ مەرزىمدەرىن قازاقستان بويىنشا 15 كۇننەن 6 كۇنگە، باسقا ەلدەردەن 45 كۇننەن 18 كۇنگە دەيىن قىسقارتۋ تۋرالى «قازپوشتا» ا ق جوبالارى دا وسىمگە اسەر ەتەدى. سونىمەن قاتار كومپانيا بولىمشەلەر مەن سۇرىپتاۋ ورتالىقتارىن جاڭارتتى جانە اۆتوماتتاندىردى، 74 سالەمدەمە سۋپەرماركەتىن ىسكە قوستى، 130 پوستامات ورناتتى. بۇلاردىڭ ءبارى قىزمەتتىڭ تيىمدىلىگىن ارتىرۋعا جانە تۇرعىندار مەن بيزنەس ءۇشىن لوگيستيكالىق قىزمەتتەر قۇنىن تومەندەتۋگە مۇمكىندىك تۋعىزدى.
ترانزيتتىك جوبالارعا قاتىسۋ ءۇشىن جانە جالپى العاندا قازاقستاننىڭ ترانزيتتىك الەۋەتىن دامىتۋ ءۇشىن، كومپانيا قىتايدان ەۋروپاعا جانە كەرى قاراي قازاقستان اۋماعى ارقىلى وتەتىن ترانزيتتىك جونەلتىمدەرگە ارنالعان حابتاردى ىسكە قوستى. بۇل جوبالار قىتايدان، رەسەيگە جانە ەۋروپاعا بارلىق ترانزيتتىك كولەمدەردىڭ 20 پايىزدان استامىن قازاقستان ارقىلى وتكىزۋگە مۇمكىندىك بەرەدى.
اۆتور: گۇلميرا عوسمانالي