جەڭىس قاسىمبەك قىتايمەن بىرلەسكەن كەيبىر جوبالاردىڭ وزگەرگەنىن ءمالىم ەتتى

استانا. قازاقپارات - ق ر ينۆەستيتسيالار جانە دامۋ ءمينيسترى جەڭىس قاسىمبەك يندۋستريا باعىتىندا جاسالعان قازاقستاندىق- قىتايلىق كەلىسىمگە سايكەس جۇرگىزىلىپ جاتقان جۇمىستار تۋرالى ايتىپ بەردى، دەپ حابارلايدى «قازاقپارات» ح ا ا ءتىلشىسى.

 مينيستر بۇل تۋرالى استانادا «قازاقستان رەسپۋبليكاسى يندۋستريالىق- يننوۆاتسيالىق دامىتۋدىڭ 2015-2019 -جىلدارعا ارنالعان مەملەكەتىك باعدالاماسىنىڭ ىسكە اسىرىلۋى تۋرالى» پارتيالىق تىڭداۋلارى بارىسىندا ءمالىم ەتتى.

«قازاقستاندىق- قىتايلىق بىرلەسىپ جاساپ جاتقان يندۋستريالدىق باعدارلامانىڭ ىشىنە 51 جوبا كىرەدى. ونىڭ جالپى سوماسى 27-28 ميلليارد ا ق ش دوللارىن قۇرايدى. ول ءتىزىمنىڭ جىل سايىن وزگەرەتىن ءتۇرى بار. ءبىر جاعىنان نارىقتىڭ جاعدايى. ول 52 جوبانىڭ بەسەۋى 2015-2016 -جىلدارى ىسكە قوسىلدى. بۇگىنگى كۇنى جۇمىس ىستەپ تۇر. ونىڭ ءبىرى «سارى ارقا اۆتو ونەركاسىپ» كومپانياسى، ەكىنشىسى «تايىنشا ماي» ج ش س. تاعى سول سەكىلدى باسقا دا جوبالار بار. ءبىر اپتا بۇرىن وسى ماسەلە بويىنشا قىتاي ۇكىمەتىمەن كەزدەسكەنبىز. جەتى جوبانى بۇل تىزىمنەن الىپ تاستاپ، ونىڭ ورنىنا 7 جاڭا جوبانى قوستىق. نەگە دەسەڭىز، نارىقتىڭ جاعدايىنا بايلانىستى جوبالاردىڭ ىشىندە مەتالل بويىنشا جۇمىستاردى كوزدەگەنبىز. الايدا، ينۆەستورلار بۇل جوبالارعا كەلمەي قالدى. ونىڭ ورنىنا ۇلكەن جوبالار كەلدى. ماسەلەن، «كوسكا» الەمدەگى ءىرى تەڭىزدە جۇمىس اتقاراتىن كونتەينەرلىك كومپانيا. ول «قورعاس- شىعىس قاقپاسى» ارنايى ەكونوميكالىق ايماعىنا كەلىپ، 49 پايىزدى الىپ جاتىر. ول ماسەلە ءبىز ءۇشىن وتە قۋانىشتى. ويتكەنى، تەڭىزدە ىستەيتىن كومپانيا ول ءوزىنىڭ تاۋار اينالىمىن قورعاس ارقىلى رەسەيگە بۇرادى. ءتىزىم جىل سايىن وزگەرەتىن بولادى. ءبىراق، قازىرگە ايتارىم - بەس جوبا قوسىلدى، 13 جوبا بويىنشا جۇمىستار جۇرگىزىلىپ جاتىر» ، - دەيدى جەڭىس قاسىمبەك.

اۆتور: ايان بەكەن ۇلى