كەلەسى جىلدان باستاپ زەينەتكەرلەردىڭ ەڭبەك ءوتىلى قالاي سانالادى

استانا. قازاقپارات - بۇگىن استانادا وتكەن باسپا ءسوز ءماسليحاتىندا ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى سۆەتلانا جاقىپوۆا كەلەسى جىلدان باستاپ زەينەتاقى جۇيەسى قالاي وزگەرەتىنىن تاپتىشتەپ ايتىپ بەردى، دەپ حابارلايدى قازاقپارات ءتىلشىسى.

«قازىرگى كەزدە بازالىق زەينەتاقى تولەنگەندە ادامنىڭ ەڭبەك ءوتىلى ەسكەرىلمەيدى. ال 2018 -جىلى 1- شىلدەدەن باستاپ بازالىق زەينەتاقىنىڭ مولشەرى ەڭبەك وتىلىنە قاراي تاعايىندالادى. ادامنىڭ 1998 -جىلى 1 - قاڭتارعا دەيىن، ياعني جيناقتاۋشى زەينەتاقى جۇيەسى ەنگىزىلگەنگە دەيىنگى ەڭبەك ءوتىلى عانا ەمەس، سول جيناقتاۋ جۇيەسىنە قاتىسۋ مەرزىمى دە ەسكەرىلەدى. ماسەلەن، زەينەتاقى جۇيەسىنە ءبىر جىل قاتىسقانى ءۇشىن، كەم دەگەندە، 2 پايىز قوسىلادى»، - دەيدى جاقىپوۆا.

ونىڭ ايتۋىنشا، ءبىر ادامنىڭ ەڭبەك ءوتىلى 10 جىلدان كەم بولسا، قازىرگى ەڭ تومەنگى كۇنكورىس دەڭگەيىنىڭ 50 پايىزى (24459 تەڭگەنىڭ جارتىسى - اۆت.). كەلەسى جىلدان باستاپ اتالعان كورسەتكىش تاعى 4 پايىزعا ارتادى. «ال ەڭبەك ءوتىلى 33 جىل بولسا، وندا ەڭ تومەنگى كۇنكورىس دەڭگەيىنىڭ تولىق سومماسى تولەنەدى. وسىلايشا، بيۋدجەتكە تۇسەتىن سالماق پەن ادامنىڭ زەينەتاقى جۇيەسىنە قاتىسۋى اراسىنداعى تەپە- تەڭدىك ورناتىلادى. ايتپەسە، بىزدە ادامدار زەينەتكە ءۇش جىل قالعاندا ءوز تابىستارىن راسىمدەپ، زەينەتاقى جارنالارىن جاپپاي اۋدارا باستايدى. ويتكەنى زاڭ بويىنشا سوڭعى ءۇش جىلدا اۋدارىلعان جارنانىڭ ەسكەرىلەتىنىن جاقسى بىلەدى. ولاي بولعان دۇرىس ەمەس»، - دەپ اتاپ كورسەتتى ۆيتسە- مينيستر.

اۆتور: ارمان اسقاروۆ